高Ling再燈死英格蘭
昨晨世界盃上演「矚目戰」英格蘭對意大利，最終意大利以2：1擊敗「英軍」，亦令高海寧（高Ling）由女神變「燈神」！原來「邪不能勝正」不能亂講，自高Ling網爆此話後逢貼必中對家，令自封「西班牙母親」及「英格蘭女兒」的她不敢再貼，反觀蕭正楠女友黃翠如身穿意大利前鋒巴洛迪利（巴神）波衫「加持」，即令對方成贏波功臣！
貼乜都唔中的高Ling決定收手唔再貼，以免再次開口「錯」！
好眼光的翠如BB着住「巴神」波衫打氣，結果意大利不負眾望勝出球賽。
作為西班牙「死忠」的無綫咪神高Ling自愛隊西班牙1：5敗給荷蘭後再受打擊，因「舊愛」英格蘭再輸1：2予意大利，即令她由女神變「燈神」。當日西班牙領先1：0時，高Ling在微博興奮留言：「OH YES！1：0！這就叫邪不能勝正！」可惜一語成讖迅即慘敗！她昨日出席活動時指睇到想喊：「直頭當西班牙係自己個仔，好傷心，好想喊，但唔會死心，唔鍾意啲人贏波嗰時就鍾意西班牙，輸波時就落井下石！」愛「子」心切」的高Ling更不惜在網上與荷蘭球迷爆舌戰。
殊不知高Ling亦是「英格蘭女兒」，她在2008年確定愛上西班牙前，與爸爸同屬英格蘭Fans，可惜對英軍有情意結的她再次「燈」中愛隊，在盛讚英軍後即慘言：「對我嚟講英格蘭就好似爸爸咁親切，適逢父親節英軍輸波，都有Send Message安慰我爸爸。」高Ling又拒為西班牙再貼餘下的賽果：「唔想再貼啦！真係唔想講，總之無論輸贏我都支持！」
翠如着得「意」戰衣
另一邊廂，作為「邪不能勝正」蕭正楠女友的黃翠如，昨日力撐愛隊意大利，更身穿意大利前鋒巴洛迪利（巴神）波衫瞓住睇波，獲女神翠如BB「加持」的巴神踢得出色，最終以頭槌頂入致勝一球，成為該場賽事的MOM（全場最佳球員），她事後興奮地說：「意大利贏波好開心！所以今日出去做嘢都着住意大利件波衫四圍走！」翠如BB昨日出席活動時心情大好，她指沒有跟男友一齊睇波，卻甜爆指男友愛睇波，又自爆仍未帶男友見家長，亦未有「時間表」！
