拍劇冇停手的黃智賢難得有假期，日前即與家人到蘇梅島度假，但整間酒店人影都唔見多隻，難道是近年搵唔少的他豪氣地把整間酒店包起？

圈中藝人旅行時不忘於微博大晒靚相，男星黃智賢近日與家人到蘇梅島度假時亦於微博上載多張旅行相。難得有假放，黃智賢去旅行便選擇最好的享受，住的酒店房非常大，還有無敵大海景，酒店的泳池亦唔講得笑，又大又靚，真係羨慕死唔少人！

去得蘇梅島，必定要游水，黃智賢亦不例外，同陽光玩遊戲之餘，又在酒店泳池進行下水禮。相中，除有擺甫士的靚仔相和風景相外，他還放上多張泳照，其中一張擺出一個跳水英姿，望落似足跳水高手。雖然黃智賢在今次旅程玩得相當開心，但表示與家人度假的他，多張旅行相中卻只見他一個，未見家人蹤影，未知是否不願上鏡？不過，他的旅行中見整個酒店都相當冷清，還以為他豪使一大筆錢，包起整間酒店呢！