藝人陳家樂近日以嘉賓身份到尖沙咀出席火鍋店開張活動，他受訪時自認是火鍋癡：「我超級鍾意食火鍋！春夏秋冬都會食，但我腸胃好差，成日食到腸胃炎。（病都照食？）係，不斷食就不斷病。」他大爆即使生病都繼續為新片完成單車訓練：「之前發燒同肚瀉都照操，仲連人帶車仆親，成個Pat Pat瘀晒！（辛苦？）教練點都想我完成整個Training，捱過咗就覺得有成功感！」問到會否因而操出六舊腹肌？他卻自爆驚變「金華火腿」：「練單車令大髀脹卜卜，仲會愈練愈鋼條，反而唔會變大隻，我驚淨係大髀變咗『金華火腿』！」

愛「滾」的陳家樂抱病操車，夠晒專業！