孖女組合AOA與鄒文正到校園宣傳反賭訊息，怎料撞正近期紅爆的「MK-Pop」組合Faith成員Sky在該學校返學，着住校服的Sky依然Chok爆，邊單手插褲袋邊玩遊戲，佔主場之利的他更贏盡聲勢！

AOA與鄒文正到校園宣傳反賭訊息，大受歡迎。

Sky@Faith佔盡主場之利，Chok爆。

細孖有份演《女人俱樂部》的AOA與鄒文正（Terry）日前到何文田一間中學出席活動，當邀請台下學生玩遊戲時，全場起哄大叫：「Sky！」原來近日爆出的Sky@Faith正正在該學校讀書，佔盡主場之利的他風頭蓋過一眾嘉賓。返學做乖乖仔的Sky雖然沒有MV中的招牌濃妝，但仍保持一股「Chok」氣，全程單手插袋，相信冧死不少女同學。

談到活動主題是「反沉迷賭博」，Terry自言從不好賭，反而有朋友曾因賭輸錢而向他求救。至於AOA兩姊妹亦十分抗拒好賭男，講明求偶條件是不煙、不酒和不賭，她們說：「如果追我哋嗰個係食煙、飲酒同賭錢的話，一定唔會接受。（好難搵？）所以依家仲等緊，好Dry！」

對於他們的唱片公司金牌大風被華納收購，Terry不擔心前景：「依家仲等緊消息，覺得有新環境先會有新嘗試，同華納初步傾咗，大家都未好明確。（擔心減人工？）唔驚，人工一向都好微薄，過緊清貧嘅音樂人生，可能我好似啲藝術家咁，死咗之後先出名。」

AOA擔心星途

AOA比較擔心影響星途：「幾擔心，驚工作量冇以前咁多，冇機會見大家，今年出碟有啲難。」