早前在電影中有大膽性感演出的雨僑，其宣傳照被姪仔認出時，驚教壞細路的她竟拒認相中人！

當姪仔認出性感海報中的雨僑時，她與家人夾口供拒認相中人。

雨僑的化妝品生意蒸蒸日上，她笑指他日可女承母業。

在《喜3》片中，雨僑與韓國型男有火辣濕身戲。

雨僑在《喜愛夜蒲3》中有性感演出，毫不錫身的她更與韓國型男大玩濕身肉搏！當日電影在港大事宣傳時，宣傳照上極奇性感的她更被年少的姪仔認出：「平時姪仔叫開我做十一姨，只會喺大型連鎖藥房見到我搽吓面，賣吓護膚品，有次喺巴士站經過見到我個性感廣告，佢問我家姐『點解十一姨唔着衫嘅？會唔會凍親？』」

「清新版」K歌

雨僑表示因家中保守，所以全家夾定口供否認她拍過性感照：「到佢大個重溫就會明白，但之後佢每日經過，睇睇吓話可能係七叔婆，即係我阿媽，因為我同媽咪都幾似樣。」

原本錢國偉導演想將雨僑的床戰鏡頭加入新歌MV中，但她顧及唱卡拉OK的未成年人士而婉拒：「我心諗MV唔使咁激呀？其實我電影拍得性感唔會介意，但想顧及去唱K嘅朋友，佢哋比較細個，最後剩番個『老少咸宜版』出街，大家睇唔到錢導嘅『導演版』！」

身為化妝品店老闆娘的雨僑透露最近生意理想，產品正式上架後她亦不用操心：「理少咗盤生意，有人會負責幫我賣，唔使我成日Check住啲員工，又唔使寄貨，只要準時出糧就得！」她笑言若他朝退出幕前，可以將生意交給未來的愛女繼承：「到時我估生意都已經好好，可以安心交畀個女處理，如果我有個女嘅話！」