無綫劇《女人俱樂部》成功翻撻張慧儀的戲癮，相隔十年後的今日，慧儀希望重返電視圈再創新一頁，並想演單親媽媽角色，相信是受養子Hanson的影響，想將最真實一面呈現出來。　

年屆40歲的慧儀心態成熟，不介意為藝術「犧牲色相」！

為養子回流香港的慧儀望再戰視圈，努力搵銀養家！

慧儀（左）因《女》劇而「翻紅」兼翻撻戲癮，相信她也始料不及。（資料圖片）

雖已年屆40歲，但張慧儀保養得宜，屬「美魔女」一族！她在《女》劇中已「糟蹋」自己，不打扮來迎合角色，要是再戰視圈，慧儀仍嫌不夠真實，甘願放低靚樣去演樸實的母親。

「筍盤」難遇

慧儀受訪時表示事隔十年再拍劇，戲癮再被撻着，故想演寫實角色：「我喺《女》劇刻意唔打扮都得啦，演戲我唔介意，因為係一個角色，只要平日出嚟大家見到我仍然係靚咪得囉！（難怪吸引到最近盛傳嘅富商追求？）只係朋友，唔係過電嗰隻，但我唔係變態嘅，有啱我一定會大膽去試，只係未遇到！（要求高？）對我好又要對我囝囝好，仲要大家思想一致，識得欣賞我……的確唔係易搵，我呢十年都未遇過！」

「失戀」十年　

十年未有拍拖，愛情路上的確有點Dry，但慧儀的心靈絕不空虛，因養子Hanson予她最大的慰藉，慧儀指Hanson是她的全部，為了養子有更合適的教育，她不惜放棄內地生意基地，轉戰香港開小型超級市場，以便Hanson入讀本地的國際學校。加上Hanson患有先天性心臟病，需長期接受治療，醫藥費對她而言是個龐大支出，愛子心切的慧儀希望借《女》劇重返視圈，留港打拚，藉以賺取更豐厚的收入，應付養子每年近200萬元的學費及六位數字的醫藥費，可謂廿四孝母親！