劉嘉玲昨晚出席活動時被讚身材Fit,她表示試過地獄式減肥,過程苦不堪言:「我請咗個教練Train我做運動,佢將我雪櫃入面嘅嘢丟晒,買過晒啲嘢放喺雪櫃,全部係我唔鍾意食嘅嘢,但只可以食呢啲,又要烚又要冇油,當時好想打佢,真係貼錢買難受,結果減咗半年,好有效,身體唔同咗。(點解要減?)覺得自己圓潤,之前係減肥,跑步同做Gym,依家變咗生活習慣。」

劉嘉玲昨日表示,每日進餐都會計算卡路里,以免超標。

嘉玲謂現在每日進餐都有計算卡路里:「要同自己交涉,我鍾意飲酒,飲酒會肥,今次食多咗下次就食番少啲,要自己調節。我會日日上磅,唔可以畀自己重多過3磅。」她又透露她有份演的舞台劇《杜老誌》排戲已到圍讀劇本階段。