安祖蓮娜妖后上身

安祖蓮娜日前與畢佬及三名子女前往上海為《黑》片宣傳，昨日獨自谷戲的她身穿黑色Deep V服裝，於東方明珠電視塔前留倩影，更被內地傳媒形容為「東方明珠與西方明珠的合影」！首次來華宣傳的她表現親民，將採訪時間由6分鐘增至8分鐘外，更大讚記者有品味！力Sell電影的她識做地表示有帶子女行街及遊覽，並大爆畢佬正在酒店與子女學整中式糕點，又透露有意與中國電影人合作！

半途「出家」

另外，大會為今日（4/6）生日的安祖蓮娜送上首飾和立體蛋糕，令她大為驚喜！完成記者會後，她聯同畢佬及三名化骨龍前往龍美術館西岸館欣賞名畫，立即引粉絲犯禁舉機狂影！他們於昨晚七時已離開上海返回美國，沒有出席昨晚舉行的首映。

安祖蓮娜表示未來希望將重心轉移做導演，更坦言想與畢佬再合作。其實早前她接受電台訪問時已承認正接洽新片《埃及妖后》（Cleopatra），前日爆出電影可能為其「幕前收山作」！據英國傳媒報道，她在訪問時說：「可能係想投入所有嘢去做嘅角色，而且喺呢度收尾同完結好偉大，除咗係呢個角色，仲會係咩？」上月自爆演戲只為圓亡母心願的她似乎想好好完成幕前生涯，改做導演及慈善工作。

另一方面，畢佬自上周被愛爾蘭記者Vitalii Sediuk於首映禮上襲擊後首度開腔回應事件：「幫粉絲簽名時望到有人衝埋嚟，即時退後一步，不過個癲佬一埋身就不停想將個頭埋喺我褲襠，我試圖破解，雖然唔太大力，但佢已放手。我諗佢當時想伸手拉啲嘢，因為班人（保安）喺佢上面，佢一伸手向上就拉到我副眼鏡！」