前港姐冠軍陳庭欣當選後密密接司儀Job，近年才有機會一嘗演戲滋味，更一試愛上，希望機會滾滾來，終極目標是鍛煉成為「好戲之人」！半年前她更升呢成為老闆娘，事事親力親為忙個不停，搞到分身不暇識男仔！

陳庭欣於《愛．回家》客串飾演醫生，近日則忙拍《商戰》，密密吸收演戲經驗。

身材愈來愈弗的陳庭欣，忙拍劇及打理生意外，早前偷閒到澳洲旅遊。

陳庭欣

陳庭欣

陳庭欣與葉翠翠於《商戰》與黎耀祥及邵美琪等合作。

葉翠翠（左）、陳庭欣

莊思敏（左）

陳庭欣開餐廳進軍飲食界，獲不少老友撐場。

陳庭欣

Toby

谷祖琳

Angelababy

李思欣（右）

近期在公仔箱不時見到陳庭欣（Toby）在劇集中的演出，自言是演戲新人的她虛心學習，笑言無論男女老幼，只要做戲經驗比她豐富都會令她兩眼發光，希望高手教路過兩招！Toby坦言幸得監製賞識，大膽試用新人，令她非常鼓舞，兼且作為「我要拍好呢套劇」的推動力！

愛回「第二頭家」

近日忙拍新劇《商戰》的Toby，在劇中飾演視帝黎耀祥的性感女秘書，盡騷美腿及豐滿上圍！外表斯文的Toby，原來兒時夢想極為配合其外形，就是當女秘書，所以今次拍劇不止過足戲癮，更令她一圓童年夢：「細個時都係想做老師、秘書，一啲比較女仔嘅職業，大個咗就覺得自己坐唔定，唔可以齋坐Office，今次拍到呢套戲好得意，順便夢想成真！」

染上劇癮的Toby自言最愛劇組之間「一家親」的感覺，又自爆羨慕好姊妹莊思明因拍攝《愛．回家》而有第二頭家，同樣有客串《愛》劇的她說：「拍劇好開心o架，我一直都好想感受吓大家喺劇入面嘅凝聚力，好似一家人咁，一齊出街食飯，唔止係工作上嘅合作，亦都係一種緣分，令到自己有歸屬感，全情投入去拍劇！莊思明由一開始入劇組，唔止演技有進步，放咗工又會同其他演員聚會，成件事都好開心！」

雖然工作忙碌冇時停，甚至通宵達旦才放工，但熱愛日式料理的Toby仍決定於去年與三五知己及父親合資開餐廳，升呢做老闆娘！Toby甘願放棄寶貴的休息時間，打理生意，總之唔忙唔舒服：「依家可能日頭開始拍劇，到凌晨先收工，我又有生意要顧，一得閒就搞吓舖頭啲宣傳工作，加上飲食業始終有淡季，點都要不時諗吓新搞作去吸引客人，但呢排冇時間落舖頭，惟有打電話問吓舖頭情況。」

Toby表示開業已半年，生意額尚算滿意，亦幸得一班圈中好友撐場，Call晒親朋戚友幫襯：「做生意好有滿足感，久唔久又可以招呼朋友嚟食嘢，好似莊思敏三姊妹咁，佢哋都好捧場，前輩黃百鳴大哥都好支持我，有時開會同朋友食飯都會Book定位上嚟，真係好感謝佢！」

冇時間識男伴

女人始終要搵個好男人依靠，不過女強人Toby卻大唱反調，淡定面對單身，事業永遠放第一，愛情包尾，她解釋：「我冇時間識男仔呀，日日都凌晨收工，見屋企人都難，事業點都係排第一，第二係屋企人，之後係朋友啦，愛情最尾！好在屋企人好開通，唔會催我快啲結婚。」雖然不急於覓另一半，但她搞笑地說：「希望舖頭嚟多啲靚仔客人啦，由客人變朋友，之後慢慢認識都OK o架！始終緣分要嚟就嚟，話唔定會好快結婚，又好快生仔呢！」

後記：親切「女強人」

身為老闆娘的Toby毫無架子，除了兼顧演藝事業外，更落手落腳為舖頭諗盡辦法推廣業務，做埋Marketing，事事上心的她絕對是不折不扣的女強人！Toby閒時亦會抽空落舖，與夥計十足一家人，不單止有講有笑，更同枱食住家飯，真係「笑聲笑聲滿載溫馨」！

明星效應開食店

民以食為天，除了陳庭欣，還有不少藝人都愛搞特色食肆開拓「錢」途！

谷祖琳

2008年與叔父谷德昭投資數十萬元在大坑開甜品店，成為明星聚腳地，更曾被拍得在甜品店內洗碗、打掃及招呼客人。

Angelababy

2011年於銅鑼灣開設美甲店，同年底又與導演陳國輝合作在旺角開設以自己作主題的Cafe，生意理想，密密開分店。

李思欣

與做生意經驗豐富的老公范振鋒及其他拍檔合資搞日本餐廳及火鍋店，總投資逾200萬。