無綫藝人龔嘉欣、李亞男及許亦妮昨日到馬鞍山出席《2014 TVB最受歡迎電視廣告大獎》宣傳活動，將以三點式拍纖體廣告的嘉欣坦言對愛情已經心淡，更揚言會儲起酬勞用作「姑婆基金」！

將以三點式拍廣告的龔嘉欣對愛情死心，現時落足心機儲「姑婆基金」。

淺露事業線的許亦妮（左）非常養眼，而張曦雯的吊帶裙亦毫不輸蝕。

李亞男在台上跳舞時表情多多。

龔嘉欣、李亞男、許亦妮、張曦雯、吳業坤、羅孝勇及蔡康年等昨日宣傳《2014 TVB最受歡迎電視廣告大獎》，身穿紅色短裙上陣的許亦妮微露事業線，非常惹火！而李亞男則穿上露腰裝，令龍友睇到透心涼。

而龔嘉欣雖然相對密實，但卻自爆即將以三點式示人：「嚟緊會着三點式拍纖體廣告，積極收腰，依家24吋，目標23吋！上次嗰輯下身有條小布仔，今次冇！（加咗人工？）係好開心嘅價錢，我會儲起嚟做『姑婆基金』！（對愛情心淡？）係呀！好多姊妹都有介紹，但都係唔啱，或者再等吓先，我又唔心急嘅！」

力撐子羚冇逼婚

當問到好姊妹姚子羚「逼婚變逼分」一事，龔嘉欣即時力撐對方：「佢冇逼婚，佢哋係了解過唔啱至分開，子羚都有追求者，佢想了解多啲至開展新感情，我同佢會互相幫眼！（佢傷心到狂喊？）佢係好堅強嘅女仔，唔會為感情喊！」

此外，提及作有限度性感是否怕男友祖藍詐型，李亞男即時解釋：「透視太多易走光！（祖藍唔准太性感？）唔係，次次做完嘢都有影相畀佢睇，佢話：『可以再靚啲！』」

對於祖藍揚言想同謝安琪拍親熱戲，她表示若為工作需要，不會呷醋：「睇吓係咪劇情需要，藝術角度OK，如果係報復就唔係咁好！」

而許亦妮則稱曾有朋友遇電影人藉詞開戲識女仔：「聽過有人借拍戲為名識女仔，面對呢種引誘要聰明少少，我啲朋友都好醒，冇中過招！如果有人約我傾電影，會叫經理人陪我一齊去，避免單獨去，所以唔擔心遇到呢種情況！」