自與鄭裕玲（嘟嘟）分手後，呂方最近再度情傾「電燈柱」，被拍得與「中女高妹」結伴買餸，搞到嘟嘟忍不住開咪暗寸「眼冤」！

嘟嘟邊笑邊揮手，咁開心莫非諗定稿暗寸舊愛？

呂方試衫時叫「中女高妹」睇水，她亦照做。

新一期《好報》直擊呂方街市拍拖，如何愛平啲啲！

早前呂方被《好報》拍得與一名白淨兼腰胸分明的「中女高妹」結伴到街市買餸，該名高妹更比他高足足半個頭，看來即使與嘟嘟此情不再，對高妹依然情有獨鍾！「中女高妹」能夠箍實呂方，全因聽教聽話、言聽計從。當日兩人一落車，呂方便點女友去買菜，女友買完會合他時，他又二話不說將餸袋遞給女友！買餸時，有豬肉佬認出呂方並大嗌：「條女真係索過嘟嘟！」而呂方亦會軟硬兼施冧女，點完女友後又會扯衫尾撒嬌。

日前兩人又現身銅鑼灣，呂方到名店裝身期間選擇困難症發作，即致電女友一齊幫眼，女友不時到門外「睇水」，離開時又充當阿四幫手抽袋，認真細心。

聞言嗌「黐線」

相反「中女高妹」相當知慳識儉，買衣服卻到平價時裝店尋寶，有知情者說：「個中女啱呂方口味，慳家得嚟又聽話，佢都年過半百啦！都唔會再出去蒲，大家都等緊佢好消息。」而「中女高妹」亦已得到呂方破例首肯，准許登堂入室過半同居生活，看來她對呂方而言應該是上等「住家菜」！

記者昨日致電呂方，他笑笑口回應「黐線」，再追問時亦只說：「做緊嘢，唔得閒，唔講喇！」之後記者再致電幾次，但他沒有再接電話。至於舊愛嘟嘟昨日如常揸車返電台開咪，身穿白衫長褲的她似乎有備而來，一直笑笑口望着記者揮手。問到是否知道呂方有新歡？她一個箭步笑着進入電台。不過未知有心還是無意，嘟嘟的節目主題是「香港讓人眼冤的建築物」，當她說到「Eyesore」時，甚有弦外之音。