「靚佬湯」湯告魯斯（Tom Cruise）亦曾淪為被整蠱目標，他於2005年出席電影《強戰世界》（War of the Worlds）倫敦首映禮，受訪時被主持用會噴水的米高峰「顏射」整蠱，相當瘀皮！而他前日拋開陰影與拍檔Emily Blunt展開24小時馬拉松式的宣傳，齊出席《異空戰士》（Edge of Tomorrow）於三地包括英國倫敦、法國巴黎及美國紐約舉行的首映禮，Emily不停轉Look，其中以尾站紐約的鮮紅色Deep V長裙最為性感，大騷半球谷戲，而於首站倫敦穿的七彩花紋淺紫長裙亦優雅大方，繼而換上火辣貼身黑皮裙出席巴黎首映，女人味十足！

倫敦
精力旺盛的靚佬湯與拍檔Emily日走三場，大擺騎呢甫士。（美聯社圖片）

巴黎
充滿默契的靚佬湯與Emily手拖手宣傳，但靚佬湯似乎未影夠喎！

紐約
靚佬湯攬着低胸的Emily依然目不斜視，定力十足！（美聯社圖片）