最近樂壇幾乎被一股「MK-Pop」新勢力騎劫，來自廣州的拾音社進駐旺角踩場，當眾派Kiss冧港女，他們除了以張學友金句反擊網民外，更寸爆其他對手冇樣、冇實力，這隊過江龍實行要搞寸個Party！

拾音社突襲旺角踩場，在街頭自彈自唱成名曲《Kiss Kiss Kiss》兼派飛吻。

拾音社在街邊篤魚蛋又逛街邊攤檔，積極融入本土文化。

拾音社殺入女人街。

日前「MK-Pop」之一的拾音社兩名成員何柏誠與李滔從廣州突襲香港，到旺角踩場插旗，首次在街頭演唱成名曲《Kiss Kiss Kiss》，他們邊彈結他，邊跳舞派吻，引來不少男男女女圍觀。其後兩子在街邊篤魚蛋，又到女人街掃貨，誓要融入本土文化，事關將會把發展重心放在香港：「香港好親切，會嚟多啲踩場，重心發展都會喺度，因為《Kiss》呢首歌而多咗人識。」

關於網民對他們的評語好壞參半，他們說：「有讚有彈都幾精彩，有人讚我哋音樂唔錯，幾洗腦。至於畀人彈都唔會唔開心，反而會睇到啲人好肉緊．有時我拍完個MV只會睇兩、三次，但佢哋反而會不斷睇，仲會同我哋講邊度唔好。」

借學友金句反擊

雖然被人笑舞風騎呢，但他們卻自得其樂，希望繼續以出位、搞鬼的風格娛樂大家，並用張學友的名句反擊：「記得學友講過『笑唔緊要，但我要你將來笑住拍手掌』，笑真係冇所謂，唔通想見到人喊咩？」

提到其他「MK-Pop」代表天堂鳥及FAITH，拾音社不留情面寸爆他們：「有聽過其他對手，但不願置評，我覺得我哋音樂同視覺造型都比較出位，我哋屬於唱作組合，相信創作力比佢哋強，加上我哋有喺內地幫人寫歌，比較全能。（後生過你哋？）睇樣啦，我覺得我哋個樣後生過佢哋！」