2007年新秀入行的林奕匡，最近推出第三張個人唱片《3》，他將自己的心路歷程融入曲中，《Good Man》終令他首奪7年來第一隻冠軍歌，讓他親身體驗如何像第二首主打歌《高山低谷》般，由低谷慢慢爬上山峰。

林奕匡憑《Good Man》令他七年來首奪冠軍歌，為其事業打下強心針。

林奕匡心情低落下寫了不少慘情歌，被讚表現成熟。

林奕匡（Phil）最近推出第三張個人唱片，當中兩首主打歌《Good Man》和《高山低谷》反應不俗，前者更令他初嘗電台冠軍歌的滋味，為從低潮中熬過來的他打下強心針，他說：「好開心隔咗咁耐出番嚟，兩首歌反應都唔錯，如果反應麻麻真係會好傷心。」

無膽返加拿大

從《高山低谷》中可聽得出Phil在訴說自己的故事，因此歌正是他在事業低潮時創作的作品：「年半前，屋企人全部喺加拿大，香港朋友唔算多，衣食住咩都係錢，壓力好大。我特登由加拿大返嚟做唱作歌手，但我唔係唱緊歌，咁我喺度做緊咩呢？嗰段時間因為咁Down所以寫咗好多慘情歌，我啲Friend以前話我寫啲歌好正，但硬係差咁啲嘢，唔夠Touching，後尾畀公司聽呢首歌，佢哋都話我好似成熟咗、成長咗。」

事業心甚重的Phil覺得一定要在樂壇做到成績，才能凱旋回歸其成長地加拿大見雙親，可是此念頭更添壓力：「去旅行可能會輕鬆啲，但我覺得未做到我想做嘅嘢唔可以去玩，返加拿大我又驚會太舒服。嗰時真係想放棄，但由參加新秀到依家都7年，真係唔可以咁易放棄，所以堅持落去。」

問到這張碟算成功嗎？足夠令他光榮地向雙親炫耀嗎？他瞪大眼說：「我仲有好多嘢做，希望再做得好啲先。（要拎到男歌手獎先返去？）男歌手獎好難喎！我依家比較想拎唱作獎項，點樣先算好成功好難界定，但《Good Man》拎到第一個No.1 Song真係好開心！希望呢首再接再厲！」