張曦雯出外工作，獲王君馨及其他工作人員替她以「鮑魚」慶生，大飽口福，其後更暢遊黃金海岸，在沙灘瘋狂拍照，可惜搞到拉傷腳，須以輪椅代步！

張曦雯性感上陣到沙灘瘋狂影相，靚就靚，可惜搞到受傷！

張曦雯與王君馨等慶祝生日，大擦鮑魚，正！

王君馨（左）向壽星女張曦雯送上抱抱。

張曦雯（中）到澳洲做司儀搵真銀。

藝人張曦雯（Kelly）密密接Job，早前到澳洲黃金海岸為一間保險公司做司儀。第一次出國做司儀的她大表興奮：「我做司儀，王君馨做表演嘉賓。佢哋公司喺黃金海岸搞Annual Dinner，又旅行又頒吓獎咁，個氣氛都好開心，係開心嘅一晚！佢哋個主題係20年代嗰啲Party咁，我最鍾意呢啲有主題嘅Party！」當晚做完司儀的Kelly雖然精力耗盡，但美食當前仍然食指大動，適逢當日凌晨是她的生日，王君馨與一眾工作夥伴「靜靜雞」買了小蛋糕慶祝，令Kelly相當驚喜：「仲有得食生日鮑魚，啲鮑魚好大隻，又平過香港好多！」

腳踭發紫痛到喊

翌日沒有工作在身，Kelly與王君馨等暢遊黃金海岸，又到沙灘瘋狂拍照：「平時好少見到咁大個沙灘，所以係咁玩水、係咁跳！」但食晚飯時，Kelly發現左腳又痛又乏力，原來拉傷了：「痛到標眼水，Production House個老闆識少少跌打，幫我捽咗幾下，成個腳踭紫晒色！」幸而王君馨自動請纓孭着連行路都痛的Kelly離開餐廳，令她非常感動，但到了機場後須以輪椅代步，認真陰功！