首次推出Hi-Fi專輯《愛‧情歌》的泳兒（Vincy），以其得天獨厚的靚聲重新演繹十首經典情歌，她接受電台DJ李國能訪問時，表示揀歌過程相當漫長，在芸芸二百多首歌中選出十首：「直頭入錄音室逐首試聽然後投票決定，最後先選出呢十首。」自言性格傳統、保守的她，最大挑戰是錄音時要化作為愛做主動的女孩，但現實生活中則絕少發生：「我係要慢慢培養感情嗰種人，我比較慢熱，如果唔識一個人，好難有愛情感覺。」

泳兒推出Hi-Fi碟，從逾二百首經典金曲中精選十首重新演繹。

泳兒接受DJ李國能訪問，無所不談。

目前與髮型師男友感情穩定，Vincy坦承初見男友時其實並不喜歡他的外形：「我之前好唔鍾意男仔留鬚，覺得好似好污糟而且有少少鹹濕，又唔鍾意男仔長頭髮，所以初初識佢時，我所有唔鍾意嘅嘢都喺晒佢度。」但經過相處後，才慢慢有進一步發展：「我哋成日一齊做嘢，日子耐咗了解到大家個性係點，可以一齊係因為性格上可以夾到，而且見到佢幫我整頭髮時好認真個樣，都好欣賞。」