有「警鐘胸」之稱的中美混血名模Jessica C.（JC），平日無論出騷或拍廣告，都毫不吝嗇大晒其34C驕人上圍，豈料最近拍攝洗頭水廣告時，竟被客戶「彈鐘」要求收起性感！

JC收起「警鐘胸」，大騷秀髮及腹肌，一樣咁索！

拍攝期間，JC不忘Chok甫及賣萌！

Jessica C.

以「警鐘胸」作賣點的Jessica C.（JC），最近接拍新一季LSnP洗頭水廣告，由於開會時曾提及會用沖涼做概念，所以JC早已有心理準備會赤裸上身拍攝。不過客戶覺得JC上圍太養眼，深怕會搶去頭髮的風頭，加上該品牌主打運動愛好者市場，故要求她以運動背心加短褲封胸上陣，好讓大家將注意力集中在其頭髮上。

捱餓操到腰抽筋

JC透露為拍攝今次廣告落足心機，她說：「我平均每日做300下Sit Up，仲有次因為太肚餓都繼續做，搞到條腰抽筋！」她苦練的六塊腹肌最終能大派用場，就算未能拋胸吸睛，相信其Fit爆纖腰都夠晒養眼！

講起頭髮，原來JC曾有不快的整頭經歷，搞到有整頭恐懼症，不會隨便讓別人碰她的頭髮，她說：「試過有一次拍廣告要戴假髮，個髮型師剪埋我啲真髮，結果除咗個假髮之後，我變咗好似鬼剃頭咁，喊咗3日！之後每次做嘢要整頭髮我都有陰影，直到最近先好番啲。」不過，她對今次拍攝的團隊則讚不絕口，除了合作開的髮型大師Marco Chan外，更有最近新冒起、年紀輕輕便拍過多本時裝雜誌封面的攝影師Ricky Lo，以及為多個香港及荷里活大星化妝的Elaw Wong做班底，認真威水！