葉蘊儀撐陳慧珊甩底有苦衷

葉蘊儀（Gloria）在無綫劇集《女人俱樂部》中演「肥菜」一角，拍攝前為角色增肥10磅，闊別公仔箱多年的她還戰戰兢兢，沒想到卻換來一大堆負評踩她的外形，又指她不修邊幅，不過身為兩個子女之母的Gloria，未有當作一回事，反而對劇集即將播完感到不捨，坦言平日不愛看電視，今次為了自己演出而捧場，友人亦不停傳短訊給她，笑罵Gloria令她們成為煲劇一族，Gloria認為這一切對她來說已很滿足。

升呢碩士做仔女榜樣

拍劇的幾個月期間，Gloria與李麗珍、張慧儀及陳慧珊等朝夕相對，友情昇華，她們圍內的7個「成年版」，私下開了電話Group Chat交流，即使現時劇集已完成一段時間，但也不時聯絡，又久不久相約飯敍。對於陳慧珊因忙於學業，未能經常參與劇集宣傳，問到Group Chat是否也同樣少出現？Glora笑說：「都有！佢忙讀書，仲要返學、湊細路同屋企，理自己都未得閒，仲要日日出街化妝咩，瞓都冇時間，讀書真係要認真，唔合格要再讀，你估有特權咩？之前我讀咗7年，朋友約我都唔得閒理，所以好明白，有時間都陪小朋友啦！反而同同學就有，不過係朋友就明白。」

對藝術方面甚有研究的Gloria，已完成碩士課程，她指當初欲以基本讀起，結果一讀便是7年，若然再進修，便要花多5年時間，她說：「除非教書就要讀，唔係就Master都OK，當年讀到Form 5都幾遺憾，又想有個榜樣畀小朋友，媽咪都繼續讀書，好在一對仔女都幾乖。（工作同小朋友點分配時間？）夜晚一定返屋企食飯。（冇戲癮？）冇咩特別，只係呢套戲又提番起興趣，以前拍嘢唔係咁長時間，電影長極都係一個月。（有冇人搵？）冇！可能人哋搵唔到我呢！」