林憶蓮與恭碩良（Jun）這對姊弟戀一直愛得癡纏，Jun趁上月憶蓮生日再度展開求婚攻勢，最終成功「得米」。為了襯得起未婚妻的天后地位，Jun四出積極撈搵老婆本，憶蓮亦不介意紆尊降貴陪食平民拉麵慶祝，齊齊為婚事捱騾仔！

恭碩良與林憶蓮孖住出巡，十分恩愛！

林憶蓮紆尊降貴陪食平民拉麵，認真唔話得！

恭碩良（左）與潮爆音樂人於街頭密密傾，見到記者即大方打招呼。

現年48歲的林憶蓮與36歲的恭碩良拍拖三年多，自從被本報獨家踢爆「婚前試愛」玩同居後，感情有增無減，雖然曾多次傳出好事近，可是Jun一直未能求婚成功。直到上月底，有消息指屢敗屢戰的Jun趁憶蓮牛一，再度展開新一輪求婚攻勢，最終獲得壽星女首肯，實行雙喜臨門！

而Jun亦開始為老婆本苦惱，始終這對姊弟戀一直被外界視為「女尊男卑」，二人收入有一段距離。為配得起未婚妻的天后地位，Jun不惜四出撈搵老婆本。日前下午5時許，Jun於中環與一位潮爆音樂人傾密偈，在記者追問下，他直言有意找對方合作：「呢個係我玩音樂嘅朋友，喺外國識，玩長笛好勁，叫咗佢幫手做音樂，但佢冇時間。」

齊歎平民拉麵

既然撈失敗，自然要錫住荷包，難得憶蓮亦甘願為愛情過平凡生活。日前晚上10時半，Jun拖憶蓮到銅鑼灣歎平民拉麵慶祝求婚成功，期間服侍周到的憶蓮為對方落調味料，又不時托腮兼含情脈脈電暈愛郎。

離開險釀意外

二人撐枱腳足足45分鐘，離開時，Jun盡顯風度為憶蓮開車門，正當他從另一邊門上車之際，怎料司機突然開車，險釀意外，被嚇窒的Jun即時拍拍心口。