蕭正楠日前為無綫新劇與Otto拍對打戲，「戰鬥格」的二人在擂台上打到「損手爛腳」，蕭正楠更被擊中下體！苦練多時的他大呼值得，問到會否請黃翠如捽藥酒，他即時叫冼師傅幫手！

蕭正楠（右）與Otto在擂台上拳拳到肉，毫不留情！

操到有六舊腹肌的蕭正楠（右）起飛腳，認真有型！

奪走蔡思貝螢幕初吻的蕭正楠謙稱吻戲未夠班。

近期備受情困的蕭正楠（Edwin）於新劇《商戰》中飾演拳手，日前與陳志健（Otto）拍攝一場擂台戲，而從「香港電視」回巢的冼灝英師傅更即場指導。二人為新劇犧牲不少，Edwin為演好角色，操得一身健碩肌肉，更於開拍前向冼師傅學泰拳。而Otto與太太外遊回港後，即時展開地獄式特訓，結果在短短十天激減15磅！監製羅永賢更大爆Edwin在這場戲中捨身演出，「損手爛腳」之餘，更遭打中「男人最痛」！

男人最痛

問到傷勢，Edwin笑說：「好多地方都被擊中，唔只下體。（咁有冇事？）仲健在，今次真係搏晒老命，吊威吔都整親條腰，不過出嚟嘅效果好好，真係好有滿足感，『甘』得嚟都值得！（翠如肉緊你？）冇同佢講呢啲。（有冇叫佢幫你捽藥酒？）唔使喇！冼師傅同我捽就得，男人捽慣啲！」他更坦言擔心影響身形，在拍攝前兩天已不敢飲太多水。對於今次與蔡思貝扮情侶，更「奪走」對方螢幕初吻，他說：「接吻戲經驗比較少，我唔算專業啦，思貝學嘢好快！」

而以身材Fit爆見稱的Otto早於劇集《拳王》中已演過拳手，他指與Edwin對打冇留力：「一拍就認真，感覺會似啲，Edwin都操得好好，有六舊腹肌！」