林峯四度在澳門舉行演唱會，貫徹「Chok峯」的他今次卻收起肌肉，轉行親民路線，反被熱情粉絲嚇親，令他差點握斷手！他又向粉絲女友千語BB派定心丸，揚言不會退出娛樂圈，但一定會與女友成家立室。

林峯蒙面上陣Chok到痹，台下女粉絲暈得一陣陣！

雖然冇除衫，但林峯的「低胸裝」仍甚有睇頭。

林峯拖着小女孩唱歌，應該唔會激親千語BB！

林峯受訪時揚言視千語BB為結婚對象，但仍未是時候做老襯。

林峯前晚在澳門威尼斯人舉行《A TIME 4 YOU林峯演唱會—澳門站》，雖然女友吳千語未有撐場，但他依然落力表演，全晚換上5套戰衣唱足24首歌，更兩度落台與Fans來個近距離接觸，但握手時被熱情歌迷弄痛得大叫：「你哋細力啲！好痛好痛，斷嘞隻手！」當他在台邊整理歌衫時，有歌迷大叫除衫，他笑說：「點解次次叫人除衫啫？睇吓有冇機會啦！」

Encore環節前，一班Dancer及樂隊成員拍攝了一條短片，代Fans問出心中的疑惑，片中有人指「聽講林峯退休喎」及「佢咁後生，唔會話退休，係咪想結婚咋」，當林峯出場時即乘機闢謠：「我都係啱啱先睇到條片，我冇講過退休，仲要開個唱，我好享受台上你哋嘅掌聲，原動力來自你哋。」有歌迷即嗌「結婚啦！」他聞言即說：「我都唔急，你反而急過我。」

只係Timing問題

完騷訪問時，林峯再次澄清未有退休及結婚計劃：「我仲想喺澳門開第五場演唱會，工作上仲有好多嘢想發展。」但仍向女友派定心丸，表示一定會成家立室：「呢個係人生必經階段，一定有呢個Moment，但暫時未有時間表。（因為吳千語仲後生等得？）即係話我老啫？唔關事，只係Timing問題，啱就會做。」