雨僑住家女人甜入心

雨僑自從在電影《喜愛夜蒲3》中濕身肉搏韓國型男後，性感形象深入民心，但私底下的她是個住家女人，煮飯及整甜品亦有一手！重視家庭的她，坦言大學畢業前會努力滿足家人期望，故希望嘗試不同的生活！

雨僑

製作方法
將牛油、糖打至軟滑，加入雞蛋漿、雲呢嗱香油拌勻。

中筋麵粉、自發粉及鹽於另一大碗中拌勻。連同牛奶加進牛油混合物，攪拌成粉漿。粉漿注入紙杯至四分之三滿，以171℃焗二十分鐘成為Cupcake。

放涼後即可唧上Butter Cream。

灑上糖霜及放上食用彩珠裝飾。

完成

雨僑

近日搬新屋的雨僑笑言家中廚房尚未完成裝修，未能煮食，故參加工作坊整甜品一過手癮！她表示平日亦愛整甜品：「會整吓Cheese Cake ，不過依家搬新屋，未有焗爐嗰啲嘢。」貪靚的她一見甜品擺設架，即閃出鬼主意：「頭先見佢用嚟擺Cupcake嗰啲架都幾靚，可以試吓用嚟擺飾物囉！」

心形蛋糕冧男友

整好Cupcake後，身穿甜美連身裙配得意頭箍的雨僑笑說：「整呢個Cupcake我覺得最難係唧Cream，要試三、四舊犧牲品先，要送畀朋友就要整多幾舊。」問到有否整給緋聞男友羅力威，她說：「冇呀，因為男仔都唔係好鍾意食甜嘢。通常都係整畀女仔多嘅。」她又分享整餅瘀事：「我細個都試過整心形嘅生日蛋糕畀男朋友，坐巴士嗰時Chok吓Chok吓，變咗個歪嘅心形！」問到男友收到如何反應，她笑說：「都要食！」

整甜品經驗多多的雨僑表示自言平日煮食以甜品及西餐為主：「中菜就比較少煮，我試過買魚返去要自己劏！西餐就易啲。」她又表示平日在家亦會親自下廚，工作多忙亦會爭取時間與家人同枱食飯：「過時過節都會同屋企人食飯，我做得最好係同屋企人食飯嗰陣冇玩電話，如果淨係掛住影相同放相上網阿媽其實好悶。」不少藝人愛自住，不過雨僑就愛黐住家人：「黐飲黐食吖嘛！面對一啲重要嘅挑戰真係好靠屋企煲湯！」近日搬新屋的她又大談揀樓心得：「廚房係一個好重要嘅陣地！依家新樓好多有Open Kitchen，嗰啲我都唔睇！其實我覺得真係煮嘢食嘅人都唔會鍾意Open Kitchen，因為你煮嘢食好多油煙嘛！」

形象多元化

忙於搬屋外，雨僑亦頻頻出動為新唱片及新戲宣傳，希望多花時間在電影上的她，深感去年的話題之作《喜愛夜蒲3》為她帶來很大衝擊：「對人生嚟講係好大嘅挑戰！有啲嘢好似做咗會死梗啦，但係我覺得唔係為非作歹害人嘅嘢，係冇啱或者錯囉！一件事你衡量過覺得OK嘅就可以去做！拍完之後做人大膽咗！其實性感係一個角色，唔同嘅角色有唔同演繹，例如之後套戲係醜樣嘅，有啲嘢試過就OK啦，你唔會想日日都係咁嘛！」

「唱歌雨僑」、「化妝雨僑」及「夜蒲雨僑」形象大不同，她說：「我覺得樣樣都唔同就係自己啦！我將屋企擺得好重，所以由出世到大學畢業我都想去滿足屋企人嘅期望，咁如果三十幾歲我結咗婚有自己嘅家庭，我又會覺得應該擺多啲時間喺家庭。咦咁我搏殺嘅時間咪即係得番二十頭到三十中左右囉！咁所以呢段時間可以試多啲唔同嘅嘢囉！」

一圓老闆夢

除歌、影、視三棲外，雨僑更是「美容達人」！自拍化妝及護膚心得短片放上網大受歡迎，她說：「其實冇預料到嘅，嗰陣時YouTube冇依家咁受歡迎，依家YouTube已經好似每個人嘅資產咁。」問到會否因走紅而停止分享，雨僑說：「我覺得唔需要定一個停嘅日子話做到幾時囉！除非我好老啦，如果唔係我唔會唔想畀你睇到我瞓醒個樣，時代唔同囉！」

經常把化妝及護膚心得拍成短片放上網的她，去年更雄心壯志一嘗做老闆滋味，推出自家化妝掃！雨僑說：「我由生產到宣傳、上架都花好多時間，好彩好多都係做決定嘅工作，執行有人幫手。」不過她還是會以演藝事業行先。