演員杜宇航被《好報》踢爆搭上鐘錶界美女胡敏珊後，開始扮大牌推戲兼想飛起師傅冼國林，惟無力賠違約金，只得死死氣續約及平住拍拖。昨日聯絡杜宇航，一提到師傅，他即心中有鬼封嘴！

胡敏珊（左）、杜宇航

《好報》踢爆杜宇航莫財，與胡敏珊拍拖都是經濟實惠為主。

現年33歲的動作演員杜宇航被《好報》獨家披露，去年與胡敏珊撻着，繼而同居，一心打算靠女友上位的他打算接拍《殺破狼2》起朵，據知情人士透露，杜宇航自覺演過「葉問」即飄飄然，在女友獻計下開始推戲、推劇扮大牌，更把心一橫飛起帶他入行的師傅冼國林，表態想解約！據知，杜宇航跟冼國林完成五年死約後，公司具行使權可先跟他於3月續五年新約，但師母認為合約精神不能違，解約必須賠違約金，仙都唔仙的杜宇航根本無力賠錢，只能續約，加上女友傳出財困，兩口子亦只能日日拍Cheap拖。

記者昨日聯絡杜宇航，問到是否曾推戲及想自立門戶，他說：「唔識答。」提到跟胡敏珊感情狀況，他說：「朋友嚟啫，冇咩特別，呢樣好難答。」

一提師傅即收口

當記者一提到冼國林，他即封嘴，只說：「我唔得閒，轉頭覆你。」而昨日致電冼國林，提到杜宇航解約及扮大牌的事，他說：「唔想回應咁多，佢始終係我教出嚟。（加簽合約？）呢個涉及藝人私隱唔會講。（胡敏珊緊張男方前途？）係佢哋兩個人嘅事，我唔會知，亦唔會過問。」