龍小菌脫俗烈女

「平民歌姬」龍小菌由網絡世界唱到現實世界，更由蒙面唱到「龍顏」盡現，毅然辭去教職做全職歌手。雖然過程中有不少批評聲音，但性格剛烈的她一於少理，繼續唱出心聲。

擁有烈女性格的龍小菌不怕被人抨擊，更會逐一反駁。

龍小菌全靠內心一直燃燒的鬥志，才可憑街頭演唱闖出頭。

搵食艱難，龍小菌強調接受商演是為了賺取創作費。

為保教職，龍小菌初時蒙面演唱，曾被指故弄玄虛。

當初礙於教師身份，龍小菌（左二）練歌時亦要蒙面上陣。

龍小菌自幼熱愛唱歌，因此特別珍惜每次的演出機會。

龍小菌

龍小菌與樂隊戰友多年來合作無間。

許廷鏗

J.Arie

影帝張家輝

龍小菌熱愛唱歌，但礙於老師身份，最初只能在網絡世界獻Sing。唱了一年後，她自覺歌癮愈來愈深，終決定以街頭做舞台，成為平民歌姬：「喺網上唱咗一年發覺冇乜進步，覺得歌手應該唱Live，所以想參加多啲表演。嗰時冇人識我同請我表演，心諗不如去街頭唱歌，但要保密教師身份，當時見蒙面喺外國都係平常事，就決定蒙面表演。」

聽書不如聽歌

她憶述當時身兼兩職，日頭做老師，只能在下課後練歌，問到後來為何捨棄安穩的教職做歌手？她說：「做老師都係想將信息帶畀學生，但喺學校有時要學生做佢哋唔想做嘅嘢，而且有啲話題比較難同學生講，咁不如填詞表達想講嘅嘢，有人會覺得聽歌好過聽書。（老師嘅收入穩定好多？）有時唔係淨係追求溫飽嘅，都要尋求理想，好似麵包同愛情咁。有時要麵包，有時要愛情，我覺得依家可以做鍾意做嘅嘢最開心！」

龍小菌本來在網上做二次創作，堅持「靠聲唔靠樣」，最終卻除罩現「龍顏」，其後更加盟補習社做「星」級補習名師，因而備受批評，甚至被指身為中文老師卻錯字連篇，面對種種抨擊的她說：「知道有好多人評論我，人哋點睇我控制唔到，唔會去理，當中可能有誤解。」無可否認，她除罩後吸金力大增，似乎與當初以歌會友的理念背道而馳，她無奈地說：「如果賣歌賣到錢，我唔介意推商業活動，但做歌要錢，如果唔拍廣告，我靠咩維持生活？我係獨立歌手，要面對唔少困難，希望大家了解我點解要做商業活動。」

虛心受教求進步

性格剛烈的龍小菌間中會「俠女」上身，在網上逐點反擊批評者，問到可自認是一名烈女？她說：「如果有人唔啱，我梗係會嬲，嬲完會講番啲客觀說話。可能係性格問題，我有時會路見不平。」問到會如何處理網民的批評？她說：「如果係攻擊就盡量唔睇，如果係評論我嘅音樂，我會虛心受教。雖然網上世界充滿批評，但走上街頭冇人當面話過我，睇嚟都唔係好多人唔鍾意我。」

「一脫成名」的她除了堅持自我做音樂外，亦希望透過個人影響力為慈善出力：「希望透過公眾人物嘅身份做多啲慈善工作，雖然好多都同唱歌無關，但如果可以幫到其他人，我好樂意做。做呢啲工作可能會令啲人知『龍小菌』係邊個，亦可能因為咁對我嘅音樂有興趣，都係一件好事！」