俏Betty遇險被捐裙底

入圍非競賽單元的動畫《馴龍記2》（How To Train Your Dragon 2）前晚在康城電影節舉行首映禮，有份配音的金像影后姬蒂班查（Cate Blanchett）及美劇《俏Betty》（Ugly Betty）女主角America Ferrera亦現身紅地氈。雖然兩位在戲中只是聲演未有見樣，但行紅地氈時當然有備而來！女神上身的America穿白色長紗裙，心口開窿直落肚臍，造型相當吸睛！姬蒂班查則配合電影以龍作主題，身穿仿麟片的大露背晚裝；另一女星娜奧美屈絲（Naomi Watts）大騷事業線及玉背，妝容被批太油膩但仍艷壓全場。

但最具噱頭的相信非烏克蘭記者Vitalii Sediuk莫屬！出名鍾意整蠱名人的他今次向America埋手。當America正與姬蒂班查等人企定定影大合照，Vitalii突然跑到眾人身後趴落地，並在眾目睽睽下捐入America的裙底，在紗裙底下Vitalii變成「網中人」，鎂光燈即閃個不停。America發現下身有異物，當然被嚇得驚惶失措！在場保安即醒水急急將Vitalii拉出裙底，但他似乎未玩夠，更笑笑口捉實America隻腳唔放。Vitalii最終不敵幾位彪形大漢，被當場抬走。

姬蒂班查拍肚安慰

Vitalii整蠱任務完成，受害人America當然嬲到頭頂出煙，皺晒眉兼儀態也不顧地怒睥Vitalii，幸而見慣大場面的姬蒂班查夠淡定，輕拍America腹部安撫。其後，兩位女星繼續行紅地氈影靚相，America的心情雖或多或少少受影響，但在鏡頭前仍專業地微笑示人。其實Vitalii惡作劇過不少名人，包括熊抱里奧勒度狄卡比奧（Leonardo DiCaprio）下半身等。不少外國傳媒對Vitalii次次都拎到大型活動入場券大感疑惑，但Vitalii最後被警察拘捕。