韓國瘦身天后鄭多燕完成兩場《鄭多燕萬人熱辣Show》後，昨晨自行乘的士到機場返韓國，入閘前向傳媒大賣口乖說「辛苦晒」，並擺出心形甫士說：「HK I Love You」及「Happy Mother's day」。有關鄭多燕前日私下開記者會惹來主辦單位負責人孫敬安批評，前晚完騷後，她出席慶功宴，並與經理人向孫鞠躬，孫昨日在電話中說：「可能佢有歉意，都冇預佢嚟，以為佢嬲吖嘛！佢哋話合約列明會場有4個大型顯示屏，係第幾頁第幾條？公開都唔怕！」盧敏儀則稱保留追究誹謗權利，而孫解釋早有預備車接送鄭多燕：「佢臨時提早要車，我哋車唔切，佢哋改坐的士，稍後更Claim番錢。」

在慶功宴上，鄭多燕（後排右二）向孫敬安夫婦鞠躬。

鄭多燕（中）昨晨返韓國，並擺出心形甫士表示愛香港。

至於鄭多燕昨晨在機場臨別時為了可與Fans齊做運動而感動，一度眼濕濕，問到主辦單位不滿私下開記者會？她說：「係公司安排，都唔係負面新聞，冇話安排不當，唔明點解唔開心。（話你要求住五星級酒店？）係公司傾，幾多星就唔清楚。（主辦單位話為你哋使咗一百萬？）唔清楚銀碼，要問番工作人員。」