龔嘉欣自食其力向上爬

年僅24歲的龔嘉欣自2008年拍攝無綫青春劇《盛裝舞步愛作戰》後，便劇接劇做到冇停手，發展順利的她曾扮演《拳王》中的虛偽女人Vicky、《金枝慾孽貳》中的強悍女人木都兒及《愛．回家》中的年輕少女Gem，人生經驗尚淺的她將不同類型的角色都一一駕馭，且好評如潮，她歸功於天生感情豐富：「我好容易畀劇本觸動到，好識放開自己，投入到睇劇本都會喊！」

謙虛的她盼能作更多嘗試，一心只想演好戲：「我份人唔貪心，唔心急想一步步嚟，可能要拍多啲愛情戲，依家演嘅角色唔多複雜，想畀多啲時間試唔同角色！」惟她開始感到迷惘：「有空白嘅時候，有啲角色唔知點做，想花時間自我增值，拎多啲經驗。想好似佘詩曼同楊怡咁成功，但暫時未得，要慢慢滲個味道出嚟！」

貴人扶持添動力

自問幸運過人的嘉欣，原來身邊不乏「貴人」，當中更包括戲劇製作總監曾勵珍：「珍姐畀好多機會我，傾心事時佢會以長輩身份教我，試吓換個角度睇嘢，好享受前輩唔同方面嘅指教。」她又自言非常好彩：「好多人都好錫我同好肯去幫我，由頭到尾都冇試過獨自面對問題，所以我時刻都提醒自己幸運唔會成世跟住我，一定要珍惜依家擁有嘅嘢！」 去年她獲無綫助理總經理區偉林點名力捧，她得悉時以為是整蠱節目的橋段，確認屬實後受寵若驚：「喺公司仲係小妹妹，好似讀書咁想畀老師讚，依家得到讚賞會有更多人留意，要做得更好！」

出道至今，嘉欣的緋聞接踵而來，關楚耀、許家傑、楊明及沈震軒等都曾與她扯上關係，但她唯一公開承認過的戀情只有鄧健泓，自去年初二人分手後，她便一直單身，以為年輕人是「Easy Come，Easy Go」，但嘉欣卻相信細水長流：「依家未遇到有感覺同適合開始嘅人，好多人話我後生要試多啲，但我唔想拍散拖唔啱就分手，我係拍拖就會諗結婚嘅人，唔排除遇到啱嘅人就會結婚嘅可能性！」並表示現時單身生活充實：「冇特別追求呢樣嘢，細幾年可能會，依家做嘢生活好充實，情人節嗰陣都想有人陪同覺得寂寞，但寧缺毋濫！」

男友煮飯仔最冧

近期有來自星星的都敏俊，再有送名車給女友的黃曉明，兩名完美男人都令港女流晒口水，但嘉欣就直言「我要嘅唔係呢啲」：「冇人會唔鍾意物質，我唔會扮清高，但最想男朋友煮餐飯畀我食，我好欣賞嗰份心機！」

相處後發現嘉欣「成熟得來不失少女」，如此矛盾的形容，正因她是外柔內剛的女生：「初初畀人感覺好受保護同弱質纖纖，但識落就會發現我係癲癲得得同好男仔頭，都會幾失望！」

能在娛樂圈生存的都是堅強的人，不然早就被淘汰，龔嘉欣這匹潛力無限的野馬，脫韁後能否成大器，大家請拭目以待！

後記：小富婆

24歲的龔嘉欣年紀雖小，但思想頗為成熟，而且理財有道，更笑言不愛購物獨愛儲錢，現正學習投資：「我好保守，唔會買風險高嗰啲！」她希望今年買樓做業主，更即場叮囑與她年紀相若的記者要學會儲錢：「十幾歲做Model嗰陣都搵好多錢，但拎晒嚟去旅行同去玩，依家諗番如果嗰陣識拎啲錢嚟買樓就好啦！不過依家仲未遲嘅，唔想錯過就要好好計劃吓！趁後生同有能力一定要儲錢！」