韓國瘦身天后鄭多燕前晚在港開Show，疑不滿被指門票滯銷的她昨午私下召開記者會，對主辦單位提出「四宗罪」！主辦單位負責人孫敬安得悉後措辭強硬兼逐點駁斥，大爆7千張門票只售出約250張，之後靠團購割價賣多50張，暗示有人號召力不足，但又要求入住五星級酒店及商務機票等。

港騷門票滯銷的鄭多燕，落力舞動觀眾。

孫敬安與老婆盧敏儀一同聲討鄭多燕的不是，逐點反擊！

鄭多燕私下召開記者會力數主辦單位「四宗罪」，老公亦有撐場。

鄭多燕老公

鄭多燕前晚在港舉行首場《鄭多燕萬人熱辣Show》，主辦商稱門票滯銷及蝕約二百萬元。據主辦單位表示，門票僅售出約250張，但鄭多燕則收逾百萬港元酬勞。

鄭多燕昨午在公司老闆及4名助教陪同下，於灣仔開記者會，她透過翻譯批評主辦商：「昨日先見到場地，我認為一千人係合適，太多人會令運動質素下降，用『萬人』係誇張！主辦商話有屏幕、攝影機各4部及旋轉舞台，到場後發現冇，好徬徨！即刻叫4個助教各企一角教舞，原本諗住落台一齊跳，但冇攝影機跟住，做唔到！（不滿？）唔係，係大家思想唔同，係可惜溝通同實際情況唔同，冇得同Fans近距離接觸！（主辦商因蝕錢而Cut器材？）冇聽過。」

做運動不為錢

她又指今後謝絕與商業機構合作：「今次收好少錢，係剛剛夠用嘅數目，但入場費收貴咗！我明白主辦方想賺錢，但同我一心想做運動嘅理念唔同，有啲傷心，做運動唔會優先考慮錢，以後唔會再同商業機構合作，寧願自己投資，我係健康傳道師，想同Fans享受運動，為咗報答Fans，秋天會同香港主題公園合作，我冇收錢。」她又澄清主辦方前日指她右眼不適不受訪一事：「唔關事！右眼問題出世已有，係因為綵排先冇受訪。」

為安全改舞台

至於鄭多燕公司老闆Roy Luang接受電話訪問時說：「合約附有技術文件，列明有乜器材，但現場冇，係違約！唔想追究，只係失望！」他指鄭多燕與主題公園的合作正在籌備當中：「老師（鄭多燕）唔收酬勞，主題公園收唔收入場費係由園方決定。」

鄭多燕前晚首場演出表現專業，由阮兆祥、陳嘉佳及蝦頭打頭陣，心情大靚的她以廣東話打招呼，又講「I Love You」！鄭多燕跳招牌舞蹈Figurerobics時跳足半小時，更不時指導台下觀眾動作，見細細粒Hea跳即督促她壓低身體，結果細細粒起唔番身要人幫手！

賣出300張飛

而主辦商老闆孫敬安昨日與太太盧敏儀於開騷前跟鄭多燕「隔空駁火」，心情麻麻的他逐點反擊對方指控，更不惜自揭肚皮大爆門票滯銷慘況：「本身有7千張門票淨係賣出250張，之後靠團購割價賣飛，都係賣多咗50張！」談到她首場不受訪，孫敬安指對方一早以短訊講明唔做，故才為她「打圓場」稱眼痛不受訪：「佢係擘大眼車大炮！」至於舞台設施不符預期，他稱因對方怕意外而取消旋轉舞台，又不禁出言窒對方未做過大騷。對於鄭多燕稱開騷不是為錢，他自爆為對方花費逾一百萬元：「佢要求住指定嘅五星級酒店，要包埋商務機票同普通機票，仲要一次過畀晒錢，佢唔係為錢為咩？佢嚟玩定係做嘢？」身旁的盧敏儀稱雙方不會再合作，孫敬安則指「唔使錢再睇吓點」。