韓國瘦身天后鄭多燕昨晚於灣仔會展舉行一連兩晚的《鄭多燕萬人熱辣Show》，眾人昨午拜神及綵排，鄭多燕因信仰問題，只雙手合十，未有上香，綵排後沒有接受訪問便離開。搞手孫敬安說：「鄭多燕右眼唔舒服，不停眨眼，被人當怪物咁睇，搞到抑鬱症。」他又指門票銷情未如理想：「原本每場五千人一齊跳，兩場加埋就萬人，但係滯銷，今晚有千三、四人。蝕約二百萬，冇法啦！始終新嘗試，依家努力做好佢！」

鄭多燕（左）昨晚以運動打扮，與觀眾一齊跳舞Keep Fit。

細細粒在台上大唱特唱，更穿緊身衫騷「纖」腰。

表演由阮兆祥、「細細粒」陳嘉佳及蝦頭三人打頭陣，細細粒笑言跳鄭多燕減了廿磅，特意穿緊身衫將「纖」腰示眾，蝦頭則笑言喜歡找男仔拍拖再被飛，以傷心絕食法來減肥，所以她時肥時瘦。之後，鄭多燕密實登場以廣東話說：「大家好，我係鄭多燕！」又透過翻譯多謝觀眾落雨仍捧場，說罷由助教教現場觀眾跳健康操。現場約有五百名觀眾，以中年婦女居多。