在內地狂賺「人仔」的鄭嘉穎相隔兩年半再拍無綫劇，「一哥」歸位，在新劇演正派偵探，相反近期上位的陳展鵬便要讓路演奸角，在新劇擔任「男二」！　

嘉穎（左）與展鵬爭楊怡，譜出三角戀。

高Ling一身白衣現身，夠晒清純！

楊怡（右）睇嚟急不及待想親高Ling香澤。

楊秀惠（左）、展鵬與林夏薇試造型時自拍，樂也融融。

鄭嘉穎、楊怡、陳展鵬與高海寧昨日為新劇《天眼》試造型，嘉穎將與展鵬在劇中爭楊怡，飾演偵探的嘉穎更會與楊怡有親熱戲，他說：「到時只錫一次，但劇中會不斷重播，好抵用！（使唔使問准楊怡好拍檔馬國明？）點解要問馬國明？唔係要問大隻仔（羅仲謙）咩？」對於有傳他在餐廳巧遇「師母」戴思聰太太時掉頭走，嘉穎說：「只可以答，可唔可以唔用嗰張相？令人十分費解，要回應嘅好多年前都回應晒！」

兩年沒演奸角的展鵬劇中做「披着羊皮的狼」，奸到出汁，對於有指他向無綫獅子開大口傾續約，展鵬笑說：「報道內容非常假，點為之大口？點為之細口？公司有自己制度，續唔續約唔係大問題，我會留喺公司拍劇，都未到傾約時候，唔使着急講條件，每個演員都希望雙贏。（改簽部頭約？）未諗到呢個問題。（有指同事眼紅你？）係咪拍劇捱到眼紅呀？」

楊怡期待咀高Ling

至於楊怡反而期待與高海寧的咀戲，因為首次錫女仔，談到羅仲謙表示母親節會送禮給楊怡媽媽，她說：「我母親節會飲茶同送花。（對羅母有咩表示？）會禮貌式短訊佢，或者有時間食飯。（兩家人一齊食？）唔係咁嘅，又唔係太熟。」而高海寧指原本與洪永城有親熱戲，但後來取消，她笑說：「我好保守，可避免就避免啦！」