前港姐冠軍陳庭欣在微博上載座駕「受襲」相片並說：「我塊擋風玻璃冇啦！唉！昨晚在銅鑼灣遇到高空擲物！實在太沒有公德心啦，如果擲到的唔係車、係途人咁點算？」原來她前晚與港姐好姊妹梁麗翹駕車到銅鑼灣時「飛來橫禍」，在糖街泊車時遇上高空擲物狂徒，座駕擋風玻璃被擲到碎裂，她接受電話訪問時說：「好彩擲落嚟唔係磚頭，只係入滿水嘅水袋，但都唔敢掂驚係鏹水。塊擋風玻璃好似蜘蛛網咁裂晒囉，好彩當時行開咗，朋友嘅司機就泊咗架車喺前面，佢話當時好大聲，仲以為撞車，仲有個叉電器擲落嚟，但就打唔中架車，跌咗喺車隔籬。」

陳庭欣慶幸事發時不在車上，否則後果堪虞。

陳庭欣原來整定泊正「黑點」：「本來泊喺後面一個位，梁麗翹落車見前面架車走咗，咁就9秒9速度泊前啲，咁就出事。警察話呢個位有人中過招，但對面冇大廈裝天眼防唔到，所以依家都未捉到人，擋風玻璃爛咗整咗二千幾蚊。」陳庭欣隨後更新微博，指被好友包括蔡思貝、翟威廉和黃建東屈她請食飯，好友指她沒有受傷實在好彩。