林峯繼去年在傳媒面前隔空向女友吳千語連講七次「好愛」BB後，前晚再施冧招讚女友有烹飪天分，又自嘲在女友面前班門弄斧，愛得煙韌的他揚言工作之餘會騰出時間拍拖。

林峯提起千語BB時，忍不住冧笑讚她廚藝一流！

陳敏之（左起）、江美儀、梁烈唯、戚美珍及苗僑偉聚首一堂，開心打邊爐。

阿佘被在場男士「集郵」，認真魅力沒法擋。

高海寧亦有現身煞科宴，更動作多多。

無綫劇集《使徒行者》演員林峯、佘詩曼（阿佘）、苗僑偉（三哥）、陳敏之及沈震軒等前晚到西環打邊爐，與工作人員一同慶祝新劇煞科，「三嫂」戚美珍及已榮休的無綫前戲劇製作總監梁家樹等亦有現身。蜜運中的林峯戴鴨舌帽登場，問到會否安排千語與媽媽慶祝母親節，他說：「睇工作安排，（影到千語同你行街時唔開心？）報道講佢扁嘴，佢表情豐富，佢唔會唔開心，做呢行會明白，我哋私下好開心，正常生活！（鍾意玩煮飯仔？）我有興趣o架，佢好有天分，味蕾又勁，食得出每道菜用嘅材料，食過乜都識得整番出嚟！未識佢之前，都以為自己好有烹飪天分，但原來喺佢面前我只係班門弄斧！」當被問到拍完劇會否有更多時間拍拖，他說：「女友都忙，要互相就時間，嚟緊我會去澳門同內地做演唱會，依家維持一年一劇，睇時間再決定啦！」

阿佘被「集郵」

至於身形比前纖瘦的阿佘，則不斷被現場男士「集郵」，她說：「呢套劇唔算辛苦，係有啲唔適應咁多動作戲，不過出面啲劇都要時間適應。」談及在網上熱爆的無綫外購劇《西遊記》，阿佘說：「我識個男演員，合作過《建元風雲》，知佢拍呢套劇，化妝都要好長時間，佢哋付出咗好多！（鍾意邊個版本孫悟空？）我都唔知有邊幾個版本！（鍾意陳浩民嗰個？）我鍾意周星馳導演同黃渤《西遊·降魔篇》嗰個版本！（冇睇過周星馳演孫悟空？）有，周星馳嘅戲套套都有睇！」