玩具大王蔡志明早前爆新抱汪圓圓佗女，圓圓昨日隨老公蔡加讚出席由他擔任會長的愛國青年組織的公開活動，為懷孕後首亮相。現已懷胎五月的她，腹部明顯隆起，名副其實變成「圓圓」，但仍貪靚穿着三吋高踭鞋！加讚承認因工作忙，少了時間陪太太，幸獲她體諒。站在加讚身旁的圓圓，笑起來時流露幸福雙下巴，問到是否懷千金時，她望一望加讚後說：「係呀！感覺到BB開始踢我！（BB未出世就旺爹哋做會長？）佢係Lucky Baby，我哋都好開心。（加讚忙話你冇詐型？）大部分時間好了解佢，知佢要做嘢，但有時受賀爾蒙影響，都會發脾氣，佢今日做會長，好有爸爸嘅模樣。」

人哋話佗女個肚係圓，睇汪圓圓又真係幾圓！

蔡加讚自爆忙得滯，冇時間陪愛妻汪圓圓。

懷孕初時圓圓嘔吐不停，現在已沒有再嘔，反而食量大增，問到是否一日吃七餐，她笑而不答，亦不肯透露現時的體重，只說母親與姊姊汪詩詩佗BB時也很吸收：「預計自己唔會太細粒，已經盡量食得健康啲，體重重過醫生嘅建議，佢教我唔好食咁多。」

加讚的兩位姊姊加敏與加怡亦出席撐弟弟，剛於四個月前分娩的加怡已完全收身，與夫婿陳漢驄拍拖到場，她透露女兒英文名叫Kyla，中文名則未有透露。提到早前豪宅差點被賊人入屋爆竊，她表示已加強保安。