愛情就是這樣，表面看扯不上關係，偏偏緊緊相扣，打風打唔甩。賈曉晨戀上「力王」樊少皇近兩年，情路上風平浪靜，未有波折，皆因她愛情觀轉變，要的是像樊少皇一樣能互相遷就共渡難關的膊頭，故即使JJ自爆恐懼結婚，但視男友為結婚對象的她決意克服恐懼︰「我會結婚，我都想要小朋友，都想有下一代。」

賈曉晨坦言對婚姻生活存有擔心，可能幾年後才考慮嫁男友。

兩年情中最大考慮是賈曉晨被指做小三，回應時眼濕濕。

賈曉晨搵樊少皇合唱，貪佢平靚正又就手！

賈曉晨與樊少皇愛遊山玩水，擁有不少共同話題。

賈曉晨與樊少皇不時拍拖斷正。

除了同愛旅遊，賈曉晨與樊少皇愛養另類寵物，未結婚已有一班「仔女」。

賈曉晨拍微電影，找來Jessica C.做主角，男友當然支持。

賈曉晨

每個人都有着自己的愛情故事，31歲的賈曉晨（JJ）拍過幾次拖，當中最為人熟悉的，就是2012年與比自己大十年的「力王」樊少皇拍拖。即使開始時不被外界睇好，而且二人看似大纜都扯唔埋，但轉眼已拍拖近兩年兼感情穩定，還不時甜蜜旅行。究竟愛情是甚麼？JJ直言視乎自己如何演繹︰「愛係啲乜嘢，我覺得係由去愛一個人，老咗死嗰日都喺度學緊，有好多人討論咗好多年都仲討論緊嘅話題，有啲人係話唔需要回報去付出，有啲人話要夾，有啲人覺得係要互相都要愛，所以每一個人都有自己嘅定義。」

兩年後先有嫁期

畢竟已踏入30大關，JJ經歷比從前多，愛情觀也同時轉變，她說︰「我每個階段都有唔同嘅諗法，以前覺得愛情大過天，只要鍾意就得，但依家係要溝通到，大家可以共同度過困難，同埋一齊解決問題，仲要有共同語言，好多嘢係要夾嘅，互相遷就。」她口中所說的，就是男友樊少皇的寫照，雖然兩人經常忙工作冇得見，但JJ直言感情穩定，而且甚少嗌交，皆因大家有共同興趣︰「我同佢都好鍾意去旅行，大家每一日都辛苦去做嘢，放低啲嘢去旅行，將童年夢想實現，感覺好開心、好輕鬆。」

從JJ的口中，兩人性格夾到爆，看來她早已認定樊少皇為結婚對象，問到有否跟對方計劃結婚？她聞言後顯得相當怕醜，然後尷尬笑說︰「我冇主動講呢啲嘢，女仔冇理由話你娶我啦！我反而有啲擔心，慣咗自己照顧自己，慣咗一個人去支撐屋企，突然間多個人，結咗婚個形式唔同咗，驚適應唔到，反而適應依家呢種狀態。」雖然講到對結婚有恐懼，但她強調婚會結，仔會生，不過何時進行，似乎不是這一兩年內的事︰「我會結婚，如果要小朋友就會，我都想要小朋友，但呢樣嘢想定啲先，因為啱啱簽北京新公司，想成件事安頓好先，其實公司冇干涉感情事，內地有好多藝人都結婚，但拍戲好好，經理人對呢樣嘢好支持，對我冇壓力。」

對愛情有了另一個睇法，也聽過別人的愛情故事，今年JJ便把這些故事寫成微電影，她說︰「呢啲唔係自己經歷，呢幾個愛情故事平時有聽過，但好少人經歷過，比較特別嘅愛情故事，但全部比較灰！」

力王有柔情一面

愛情微電影中，JJ與樊少皇情侶檔上陣合唱兩首歌，問到為何會揀與男友合唱，她講笑說︰「7首主題曲中兩首係同佢合唱，哈哈，方便嘛！隔籬一執就係，唔使咁多錢請出面嘅人，同埋佢本身鍾意唱歌，天生把聲OK，咁我見本身有條件又平靚正，咪叫佢返嚟唱番，佢又冇得話唔好。」難得男友開金口相助，可會獎勵對方？她再甜笑說︰「冇呀！嘩！佢啲歌可以發表出嚟對佢嚟講係好事，哈哈！因為佢本身打功夫，原來仲有柔情一面，所以佢應該獎勵我。」見到JJ臉上掛着一副幸福的笑容，已解答愛情是甚麼了！

後記：唱得美人歸

JJ又靚又有身材，樊少皇能夠抱得美人歸，當然下了不少工夫，JJ踢爆男友初時愛錄冧歌氹她開心︰「佢好鍾意唱歌，咁都幾好聽，以前初初開始時佢都有錄啲歌畀我聽，依家現場唱畀我聽就得喇！」原來追女仔不用銀彈攻勢，各位巴打要學吓嘢。