張苡澂信錯工人失近百萬財物

曾經被傳是周汶錡情敵的歌手張苡澂，昨日原本要到商場出席活動，但最終缺席，大會解釋她因遺失證件而滯留內地。其後記者致電張苡澂求證，她自爆復活節期間去上海探哥哥，前晚飛返深圳：「喺機場拎晒啲行李之後去廁所，行李、手袋畀工人姐姐睇住，去完廁所之後隨身物已經唔見晒！」只見工人姐姐手上有個不屬於自己的手袋，裏面放滿文件，她將手袋交給航空公司人員處理。問到是否工人失職？她只報以嘆氣：「我係佢第一個僱主，佢新嚟o架！」

被老公「哦」爆

事後，張苡澂立即到深圳公安局備案，並補領臨時證件返港，今次損失慘重，失近百萬財物，包括兩部手提電話、銀包、一隻價值數十萬元的鑽石戒指、一隻價值十多萬元的鑽石錶及兩個名貴手袋。當提到老公，她表示老公知情，已經立即幫她補領電話卡，並坦言被老公「哦」。她自言平日出街不會戴鑽石戒指及鑽石錶，去旅行才會戴：「最心痛係唔見咗兩個共廿萬嘅名牌袋！」問到老公會否補送鑽石戒指？她口窒窒地說：「唔知佢呀……」而記者致電周汶錡，問到有關張苡澂失財物一事，她急急劃清界線：「我都唔識佢！你哋唔好問啲咁無聊嘅事！」

張苡澂於2009年被影到當時仍未與周汶錡結婚的法籍男朋友Julien Lepeu在尖沙咀街頭激咀，她事後稱當時不知道周汶錡是其女友，更爆Julien極為猴擒。而周汶錡妹妹周麗淇當時更寸爆張苡澂扮偉大為博見報。