蔡少芬昨日出席活動時表示，想操到比老公張晉更Fit，更宣示「大婆主權」，叫其他女士對老公「眼看手勿動」！

蔡少芬老公張晉大騷腹肌引死女，難怪她要叫其他女士對老公「眼看手勿動」。

方力申和鄧麗欣孖住聯同方中信、關禮傑等齊齊出席剪綵活動。

蔡少芬（Ada）、方力申、鄧麗欣、張文慈和陳靜等昨日出席「一寶高級海鮮火鍋」剪綵，以白色小背心上陣的Ada身形Fit爆，但她毫不自滿地說：「想操到老公（張晉）咁Fit，睇到我老公就……唔輸得畀佢，要操番條小蠻腰！（怕老公Fit多女埋身？）眼看手勿動啦！我同兩個女就摸得，要私有化佢。」從三亞拍攝空檔抽空回港的她笑說：「我叫晒全家過去三亞，順便旅行，兩個女曬到好黑，依家叫佢哋朱古力。」

而情侶檔出席的方力申和鄧麗欣（Stephy）受訪時就否認是夫妻檔，小方說：「嘩！未到！」拍拖多時的他倆對一起搞生意表示怕怕，小方說：「我哋平時都好少講工作！一齊拍戲都會有爭執，做生意就更加。」

小方搞Foodcourt

Stephy被問到若小方打本，想搞甚麼生意時說：「時裝、甜品糖水同打邊爐都有諗過，同朋友都成日打邊爐，咁就自己有個地方，又可以做生意。」小方亦透露有好友將開商場，有意叫好友讓他經營內裏的Foodcourt：「搵藝人去開，帶旺個場，我抽少少佣就得啦！」

至於性感露事業線的張文慈自嘲做生意唔叻，談到搵個男友教做生意時，她嘆氣說：「未有！都唔知點解冇人追，如果呢兩年嫁唔出，我唔結婚喇！」