同志影星茱迪科士打（Jodie Foster）發言人證實，茱迪上周與女友Alexandra Hedison已低調拉埋天窗，兩人早於上月曾被拍得戴着戒指外出。

去年於金球獎宣布「出櫃」的51歲荷里活影星茱迪科士打，上周與44歲攝影師女友Alexandra Hedison低調舉行婚禮，茱迪發言人前日向傳媒證實喜訊，更指兩人愛得瘋狂。茱迪與Alexandra拍拖近一年，從未公開承認女友身份，但兩人去年被目擊公開現身洛杉磯霍士電影公司，並在數日後孖公仔與數名友人外出晚餐，隨即傳出緋聞！

簡約戒指證盟約

上月初，茱迪被拍得與左手無名指戴有戒指的Alexandra在比華利山停車場搭膊頭晒恩愛，她其後亦換上T恤及緊身運動褲風騷晒戒指，令秘婚傳聞甚囂塵上！兩人的戒指同樣是簡約的金戒指，並不花巧。

金球獎宣布出櫃

茱迪與Alexandra蜜運前，曾與電影女監製Cydney Bernard拍拖15年，茱迪希望一嘗為人母親的滋味，被指以人工受孕方式於1998年及2001年誕下兩名兒子Charlie和Kit，兩人於2008年分手後共同撫養兒子。她們分手後一直保持好友關係，去年更被拍得一起歎咖啡，甫見面即相擁慰問，茱迪更細心地為Cydney整理頭髮。

茱迪去年於金球獎獲頒終身成就獎，在台上首次公開同志身份：「呢個唔係一個盛大嘅『出櫃』演講，因為我早喺遠古時代已經『出櫃』。喺嗰啲奇特嘅日子，一個脆弱嘅女仔開口同信賴嘅朋友、家人仲有同事講，然後自豪地向所有認識嘅人講出心入面嘅說話！我知道所有人都期待名人會開記者會或者喺真人騷公開私生活，但唔好意思，呢個唔係我，以前唔係，將來亦唔會係。」茱迪致詞時不忘感謝Cydney的恩情。據悉，Alexandra曾與名嘴艾倫迪珍妮絲（Ellen DeGeneres）拍拖三年，兩人於2004年分手。