車車（張紫櫻）為歌手李安豪新歌《大澳愛上威尼斯》MV客串女主角，穿低胸衫、戴假髮扮演夜蒲壞女友，更有怒摑李安豪的場面，車車說：「我從未試過摑人，今次拍MV終於學識咗摑人嘅學問，前前後後都摑咗李安豪十巴以上，我已經自行調節咗喇！拍遠鏡就細力啲，近鏡為咗一Take過至狠摑，但最終都搞到佢塊面係晒手指印，我都好唔好意思！做野蠻女友原來唔容易，我仲拍到冷病，失咗聲成個禮拜！」

車車戴上假髮又拋胸，「情挑」李安豪。

問到是否因穿低胸衫而冷病，她說：「角色需要啫！個MV講個女仔好鍾意夜蒲，應該冇乜夜蒲女會着樽領去蒲啩？戴假髮都係想突出角色。其實拍MV都幾好玩，因為我好想做演員，可以畀我過戲癮，拍喊戲雖然難，但近排我都為情所傷，所以好快投入角色，工作人員Roll機前仲問我使唔使滴眼藥水，點知見我Cut咗機都喊到收唔到聲，嚇到佢哋以為我有事！」