型男尹子維一直過着「冇腳雀仔」的浪子生活，對愛情自有一套看法的他坦言會隨時閃婚，卻一直未找到令他心動的女生。要數最心痛的一次，是他揭發舊愛一腳踏兩船，自此他便立志要做個專一男。

尹子維直言不排除閃婚及不婚，只因他對感情有另一種睇法。

尹子維曾與「宅男女神」貝安琪傳緋聞。

戴上黑超的尹子維Chok晒甫，有型又有款。

尹子維事隔兩年再推出唱片，相信會吸引不少女粉絲爭相購買。

歌影雙棲的尹子維事隔兩年再推出唱片，主打歌《潛規則》講述時下男子背住女友出軌的經歷。子維認為在這個思想開放的年代，「偷食」不再是男性「專利」：「我覺得今時今日唔只係男人有偷食呢個念頭，當一齊耐咗，女仔都會。我從來都唔玩呢種遊戲，我係誠實、坦然嘅人。」

舊愛偷食扮唔知

他憶述曾發現舊愛出軌，卻詐傻扮唔知：「透過身邊人知道佢偷食，我都唔識反應，我唔覺得呢件事係問題，問題係點解要偷食，如果大家關係冇問題應該冇人想偷食。（好Hurt？）當然試過，但消化完就明白人嘅需要好難捉摸，最後我都冇問佢原因。」

子維表示這幾年因專注事業而未有拍拖，又指身邊不少已為「人夫」的老友勸他不要結婚：「所有結咗婚嘅人都叫我唔好結，但話唔定有日我會衝動結婚，唔排除會閃婚，但我個人好Open，亦分分鐘唔會結婚，始終我唔想咁拘謹過人生。」

而其另一新歌《無需想太多》亦是他的人生寫照，曾經歷一段脆弱時期的他強調多得朋友及親人在旁打氣：「當發現自己方向係錯誤，始終會經歷一段迷失，我都唔例外，仲要唔止一次，我唔開心時，多得親友陪我過咗嗰段時間。」