「亞洲瘦身女王」鄭多燕愈跳愈紅，最近踩入香港開騷，與千位粉絲「切磋」一番。她更成為子女的驕傲，經常被要求簽名派通街威番次！

鄭多燕將在港開騷，無奈子女要返學未能撐場。

鄭多燕連拍照都動作多多，十足在做健美操。

自創瘦身舞的鄭多燕，笑指子女不肯跟她做運動。

現年47歲、來自韓國的「亞洲瘦身女王」鄭多燕，早年在老公激勵下及基於健康問題，立定決心自創一套Figurerobics瘦身舞而減肥成功，隨即引來全球熱話，不少圈中人爭住跳喼弗，紅爆的她5月將踩入會展，率領千位觀眾大跳瘦身舞。

首次在港舉行「萬人Show」的鄭多燕，大呼緊張又期待：「非常期待，希望教到大家點做運動可以更開心，自己都有諗好多方案，由播咩音樂到做咩步驟都有諗。」她透露邀請曾在個唱大跳其舞步的校長譚詠麟到場「切磋」，但未知能否成事。

諗定新舞步

受盡熱捧的鄭多燕，成名後亦沒偷懶：「每分每秒都有諗新動作，有好多唔同靈感，因為同一個動作長期做身體已熟悉，效果冇咁明顯。」至於近年工作量大增，這位人妻兼人母竟笑言子女寧願她不在家：「佢哋鍾意我唔喺屋企，因為大個咗，當咗自己係成人，同埋有奶奶、姑仔睇住，唔擔心。」雖然子女鍾意「無王管」，但依然以她為傲，鄭多燕說：「佢哋覺得我多人識好威，成日同啲朋友講我啲嘢，又叫我簽名畀佢哋周圍送畀人。不過佢哋嘅朋友同我好熟，成日嚟屋企，仲玩到唔想走添！」