樂隊Mr.早前為籌備處男國語專輯，專程飛到台灣學普通話及感受當地文化，五子寓工作於娛樂，成員Dash更帶埋「老婆」單車同行，五子一有時間即相約到郊外野餐放鬆心情，Dash坦言得到不少創作靈感兼增進兄弟情：「大自然令我哋視野廣闊啲同洗滌心靈，喺香港好少約埋野餐，每次齊人都喺Band房或錄音室。」問到有否四出食好嘢？主音Alan說：「有呀！去到唔會有肚餓感覺，周圍都係食店，仲要好好味！」問到是否變成豬咁肥？食到吮晒手指的Dash哈哈大笑說：「點會呀？我哋日日都有踩單車，我仲帶埋私家單車過去添！」Alan更一嘗玩滑翔傘滋味，並高呼過癮，為留住美麗一刻，更冒住跌手機的風險玩自拍。

Alan邊玩滑翔傘邊自拍，好彩手機冇跌落街！

Mr.五子齊齊遊台，籌備新碟兼攞靈感。

玩得盡興，Mr.亦努力工作夾Band。

Dash（右）大擦美食，吮晒手指舔舔脷！