歌手麥貝夷和藝人陳炳銓為了討好另一半，相約進行變靚大計！麥貝夷植眼睫毛打造迷人電眼，陳炳銓則進行腳部水療去死皮，夠「Spa」閉！

Danny興奮伸出大腳板，預備接受帝皇式水療享受。

植眼睫毛前，Karene扁晒嘴兼耍手擰頭，要變靚後叉滿電先敢發電！

Spa護腳Come On!
先用溫水清潔雙腿及浸軟腳皮

專人修剪腳甲

進行腳部磨沙，去掉自然累積的死皮

配上玫瑰花瓣和香鹽按摩雙腳，有助血液循環

敷上腿部專用的面膜，讓雙腿肌膚補充水分

植眼睫毛Start!
清潔雙眼四周圍多餘的油脂

美容師會根據客人眼睫毛的展度及弧度，選取適當的假睫毛

戴上護眼膜來保護眼睛

用藥水逐條將假睫毛黏上真眼睫毛

等待風乾約半小時，打造迷人電眼

Karene做手部Treatment兼美甲，舉手投足都要靚！

歌手麥貝夷（Karene）剛擺脫「盛女」行列發展新戀情，為了箍實男友，當然要時刻保持最靚狀態，向來屬愛美一族的她決定植眼睫毛，打造Bling Bling眼！除了為悅己者容，植眼睫毛原來也是工作需要，她表示早前參與微電影，飾演一名民初時期的少女：「拍民初戲黐假眼睫毛好似太過現代，唔多夾，加上拍拍吓戲眼睫毛又會成日彈起。」

自信心返晒嚟

Karene表示因睫毛太幼，即使塗上增長液後，效果也不顯著，最終把心一橫決定植眼睫毛，定期每隔幾個月做一次療程，「大翻身」後的她笑說：「擘大對眼嗰刻即刻覺得自己變咗個靚女，之後化眼妝條眼線都唔使畫得太勁，終於有條件可以狂發電！」

別以為扮靚是女人的專利，藝人陳炳銓（Danny）一樣貪靚，獻出了第一次的腳部水療！他說：「第一次畀人帝皇式服侍，因為我有參與行山節目，腳甲行得多都會爆甲，所以今次可以功能性咁修甲。」美容師為Danny磨腳皮時，令他不停慘叫，他笑說：「原來磨皮係咁痛，又有啲痕，不過都好嘅，我要跳踢躂舞，依家少啲腳皮可以令我跳得靈活啲，敏感度高啲，感覺成隻腳都輕咗。」

失「手」No Way！捉男友做護理

Karene亦順道在美容院Gel甲兼做手部護理，興奮表示雙手滑溜了不少：「真係覺得滑咗，少咗倒刺。（男友讚？）有呀，我不嬲都好好拖，不過我嫌佢對手有啲粗糙。」她自爆有次二人在屋企玩煮飯仔時，驚覺男友雙手「核突」：「有次一齊搓肉丸，我先睇清楚佢對手好核突，死皮勁厚，所以得閒都要捉佢去做護理。」

與Karene同樣有做手部護理的Danny表示女友經常突擊檢查手指甲：「女朋友好鍾意乾淨，成日會檢查我手指甲，如果有『綑邊』，佢就會幫我剪走。」