出爐金像影帝張家輝近年搏到盡，為拍戲苦練大隻，打打殺殺亦在所不計！而在英皇電影《魔警》中，他不玩肌肉改玩火，更親身上陣衝入火場，其燒傷妝容似足喪屍，非常恐怖！

在新片《魔警》中，張家輝以恐怖喪屍樣親身上陣衝火場！

張家輝（左）在戲中被人放火尋仇！

張家輝坐定定化燒傷妝容，非常逼真！

出名拍戲唔錫身的張家輝，在接拍英皇新片《魔警》時已向導演林超賢事先聲明不再做肌肉人，林導聽罷即表示要放火燒家輝，而且他講得出做得到，公然「火燒影帝」！劇情講述家輝被人放火尋仇，為救母親不惜衝入火場，結果慘遭燒死，導演更出言「威脅」家輝：「衝入火場，燒到甩皮甩骨先好出番嚟！」

乸住乸住留紅印

拍攝現場為求逼真而使用真火，雖然非常危險，但專業的家輝依然親自上陣！

而每次拍攝均須花四小時化妝，務求呈現出皮開肉綻的真實燒傷效果，家輝的造型猶如喪屍一樣，超級恐怖！他表示落妝後出現「爛面」情況：「其實化妝嗰陣冇乜嘢，只係唔郁得喺度等，都仲OK。不過落妝就麻煩好多，要搞成個幾鐘！啲假皮用膠水貼上去，要用到特別卸妝水先抹得走，但抹完之後成塊面『乸住乸住』，落完妝仲要有一個個紅印，無論我返屋企洗多幾次面都唔得！」

為拍戲搏到盡的家輝隨時在明年的金像獎三度封帝，但他反而睇好拍檔吳彥祖：「作為演員最重要並唔係攞獎，而係喺事業上有冇突破，可唔可以帶新鮮感畀觀眾！」