顏卓靈飛躍舞台

去年因主演跳舞電影人氣急升的20歲「狂舞少女」顏卓靈（Cherry），升呢提名金馬獎最佳女主角，與章子怡、桂綸鎂及舒淇等前輩拗手瓜，最後敗給子怡可說雖敗猶榮，最近又獲香港電影金像獎影后提名，演技再度被肯定，但Cherry未被沖昏頭腦，她謙虛地說：「其實我唔覺得舊年係特別進步，我一直都默默努力，只係咁啱有機會同大家分享少少成果，人生係長時間競賽，要Keep住進步，不過多咗人認識，真係好幸運。」

甘於平凡

人氣急升的Cherry成為少男少女偶像，但她笑言仍不講究衣着，打扮相當「融入社會」，她說：「以前15分鐘就出門口，打扮好求其，依家好啲，會用30分鐘，但仲係好Casual。」不過，她在街上仍不時被人認出，最令她意想不到是當中包括長輩，榮升「阿伯殺手」的她笑說：「有次落大雨，我同朋友逼住擔遮，有個迎面而來嘅伯伯突然指住我話：『你！』令我好驚，以為篤親佢，之後佢再講：『你！好嘢！狂舞小姐！』最驚喜係佢話睇完套戲覺得好感動，好開心的確令唔少成年人再諗追求夢想。」

雖已踏出成名之路，但她慶幸同學仍當她是平凡人，相處跟以往沒有大分別：「我哋讀英文系啲女仔，表面好斯文，其實都大癲大肺，最多係有時笑吓我，話見到明星，但大家依然相處好自然。」

Cherry拍過多個令人印象深刻的廣告，曾憑電影《大追捕》贏得導演會年度新演員獎，去年更獲金馬獎影后提名，算是比一般新人行運，問到今年會否想再有突破，思想成熟的Cherry自問年紀尚幼，未必有太多可發揮的角色，只好盡力把握演出機會：「香港電影大部分係男星主導，亦好少有女角係我呢個年紀，啱我嘅角色唔多，所以我冇乜野心，有角色演已經好好。」

自我增值

仍是大學生的Cherry希望繼續兼顧學業及演藝工作，計劃自我增值，如練舞練歌及空中瑜伽，修讀英文系的她中英文程度不錯，更立志想出書做個「文舞雙全」的女星：「我之前都有寫散文，可以透過文字表達自己，題材天馬行空，好似寫信畀唔同嘅嘢，好似一棵樹一朵花，寫吓對每件事物嘅睇法同感覺，亦會有隱喻。（集結成書？）都希望，睇吓有冇人欣賞，到時要用個主題去包裝吓。」

90後新勢力

一代新人勝舊人，Cherry於1993年12月27日出世，圈中尚有多位90後「新星勢」，前途無限。

吳千語（1993）

電影公司老闆黃百鳴愛將，與無綫小生林峯拍拖後身價即暴升十倍。

蔚雨芯（1993）

13歲被發掘，前年以女歌手姿態入行，去年出寫真，以「魔鬼胸」秒殺宅男。

王敏奕（1992）

曾演出多部電影，演技獲讚，在無綫劇《女人俱樂部》演少女李麗珍。

成長路

今年20歲的Cherry由拍廣告入行，星運不俗，小小年紀更獲影后提名。

孖祖兒合作

中二時被睇中拍原子筆廣告，其後拍下多個廣告及曾與容祖兒合作。

奪新演員獎

Cherry憑電影《大追捕》贏得導演會2012年度新演員獎。

邀赴電影節

獲邀出席烏甸尼斯遠東電影節，首次踏足歐洲的Cherry直言相當難忘。

提名金馬影后

去年提名台灣金馬獎影后的Cherry，穿香檳金晚裝赴會，大晒成熟美。

後記：迎接高低起跌

鏡頭前的Cherry經常甜笑發放正能量，總是傻更更的樣子，但踏入二字頭後，Cherry思想變得更審慎，提到「夢想」這話題即認真地說：「以前夢想係做演員，依家有機會達成，更明白條路好長，可能要十幾廿年不斷去學習，心態反而冇以前咁肯定，有啲迷惘，要學識調節心態，迎接之後高低起跌。」