吳啟華、徐子珊及黃德斌前晚出席劇集煞科宴，子珊笑言拍攝最難忘是見到滿身肌肉的男囚犯「放風」，啟華則表示與子珊「咀到嘴都歪埋。」

吳啟華與徐子珊在新劇中有不少咀戲。

徐子珊（右起）、吳啟華、王浩信、黃德斌與朱千雪出席煞科宴，玩得開心。

吳啟華、徐子珊、黃德斌、王浩信及朱千雪等前晚出席劇集《再戰明天》煞科宴，無綫助理總經理區偉林亦有撐場並代表公司慰勞一班台前幕後功臣。原本打算夾錢請客的啟華即笑說「慳番」：「講笑，我哋會將請客啲錢攞出嚟搞Party同抽獎。」與子珊首次合作的他大讚對方「正到不得了」：「好戲、靚女、個人又隨和，有機會要再合作！（有咀嘴戲？）好多，咀到個嘴都歪埋！」子珊即笑說：「講呢啲！」她表示拍攝最難忘是到赤柱監獄實景拍攝時見到男囚犯「放風」（到操場散步休息），她說：「佢哋好大隻，好多肌肉。（向你叫囂？）冇呀，佢哋好禮貌，好安靜。」而出名有「42吋」胸肌的德斌亦笑言跟男囚犯「各有各大隻」：「依家監獄裏面待遇好好多，唔係以前監獄風雲年代，有營養師照顧佢哋飲食，除咗冇自由之外都唔錯。」

同志偉去旅行

此外，啟華又透露稍後會和曾志偉到新加坡旅行：「同高爾夫球會嘅人一齊去慶祝佢生日。（玩得癲？）唔會太癲，呢班都係老餅。（準備驚喜畀志偉？）有，不過話明係驚喜梗係唔講得。」而區偉林則表示近年無綫員工的福利有改善，令幕後更團結。