林超賢憑《激戰》再度角逐本屆金像獎「最佳導演」，他坦言這套電影帶給他的已超出預期，得獎與否只以平常心面對。回憶起拍攝時男主角張家輝受傷，差點令電影「流產」，他感激對方「頂硬上」助圓夢，更希望家輝能憑這部電影再次稱帝。

張家輝（左）及安志杰在《激戰》中的落力演出，不但受到觀眾的認同，還得到導演林超賢的讚賞。

第4度入圍金像導演的林超賢，對於能否獲獎，他表示只以平常心面對。

最佳導演

第4度入圍金像導演的林超賢，坦言已沒有上幾次那麽緊張，但仍將心情保持「新鮮」﹕「我個女做義工要上台講嘢，我同佢講，要時刻享受呢種感覺，保持住團火！」

面對幾位對手，林超賢認為自己的資歷只屬一般：「個個都係好嘢，論資排輩未必輪到我，好似Benny（陳木勝）咁，我都做過佢PA（製作助理）啦！總之每套戲都會有大家喜愛嘅地方。」

猶記得《激》片開拍之初，男主角張家輝拍攝一個普通不過的鏡頭，但最終竟受傷骨折，令林超賢捏一把冷汗：「一睇成隻手指『Z』咗就知大件事，佢仲要拍埋個鏡頭先去醫院，休息1日又再開工，真係好多謝佢！如果唔頂硬上嘅話，套戲分分鐘停拍，放低咗隔得太耐，可能就唔會再開番！以我個人嚟講，梗係想佢再次有獎攞啦！」

電影票房全年之冠

而《激》片最終創下逾4,400萬票房佳績成為「全年之冠」，林超賢說：「最初畀業內人睇作評估，有人同我講『最多千七萬啦』，但我已經覺得幾好。第一日上映遇正打風，點知都收150萬，好似幫我打咗支強心針咁，埋單收四千幾其實都未計得1間戲院上嘅澳門嗰300幾萬票房，講唔滿意點都講唔過去啦！」

相比其擅長的動作片，林超賢認為《激》片拍得相當輕鬆，故得着比付出多：「最近我準備緊開拍以單車為主題嘅新片《破風》，同前港隊代表洪松蔭多咗接觸，有日佢攞隻影碟嚟畀我簽名，同我講入戲院睇咗8次，喺屋企睇咗5次，幾乎每句對白都背得出，仲話流咗男兒淚。有咁嘅支持者，我又點會唔感動呀？」