李若彤拒與古仔姊弟戀

李若彤、李麗珍、張慧儀及吳啟華等昨晚在鑽石山宣傳無綫新劇《女人俱樂部》，「少女版」成員糖妹（黃山怡）、陳嘉寶、王敏奕及吳嘉熙等，穿上螢光襪褲騷「象腿」，並與半百師奶跳勁舞。現年40歲的李若彤外形Fit爆，她自爆有腹肌及人魚線：「最緊要勤力，世上冇醜女人，只有懶女人，自己都有健身，但唔係為減肥，係想有線條。」雖然劇中未有機會騷肌，但她也不介意為慈善而露。問到對收視可有壓力？她說：「冇諗，我一向都係盡力做好自己，知道套劇早幾個月播都緊張，但開始宣傳就覺得順理成章。（想再拍劇？）呢啲可遇不可求，要劇本啱先拍。」她盼望與劉青雲、金城武及苗僑偉（三哥）合作，但曾合作《神鵰俠侶》的古天樂，她卻甚為抗拒：「同太後生拍好似姊弟戀，但如果套戲講姊弟戀就OK。」

李麗珍囡囡鍾意柏豪

至於李麗珍女兒早前被偷拍，更獲網民讚愈大愈靚，她指囡囡已到加拿大升學，未有想過入行，反而希望媽咪繼續拍戲。李麗珍直言女兒要求高未拍拖，並笑說：「個女話香港靚仔多，佢鍾意周柏豪、《救火英雄》，囡囡想我同柏豪合作。」此外，張慧儀透過電話表示，享受今次整個拍攝過程，並透露無綫於過年前曾洽談再拍劇，可惜自己時間未能配合。私下有做生意的她稱，不考慮跟電視台簽長約，但有適合劇本不排除再演戲。至於感情方面，張慧儀稱一切隨緣，最重要是另一半能接受囝囝。