王祖藍及李亞男昨日情侶檔出席麗星郵輪「處女星號」的《香港．啟航》慶祝典禮，穿高貴白裙的亞男寸男友不交出財政大權，甜蜜又搞笑！

亞男讓祖藍扶實落樓梯，浪漫到有如公主出場。

祖藍與亞男合照時站高一級，自行Tune正高度。

王祖藍昨日與女友李亞男出席慶祝啟航典禮，獲贈豪華套房船票的祖藍笑言，要留待度蜜月時用：「朝結婚方向進行中，不過暫時冇時間結婚，搵夠錢先啦！（同李亞男開聯名戶口？）我嘅即係佢嘅！佢知我有幾多身家啦！」亞男聞言即「畀說話」祖藍聽：「淨係知啫！都唔係有！」令祖藍哭笑不得，場面爆笑！問到會否舉行郵輪婚禮？祖藍反問：「有冇贊助先？」

邊個抹黑 心中有數

談到發聲明反擊黑工風波並於微博狂呻，祖藍稱若再被抹黑，會採取法律行動：「佢啲資料錯晒！係行內人做，我心中有數，佢『捕』咗我一輪！（得罪人？）冇，可能佢妒忌同唔抵得，希望佢哋唔好再搞，否則會採取法律行動！（心情如何？）好舒暢！」亞男亦力撐愛郎：「冇影響心情！忘記佢啦！」