影帝張家輝及吳彥祖(Daniel)昨晚出席英皇電影《魔警》亞洲首映禮,Daniel表示今次兩人得兩場對手戲,感覺未夠盡興,家輝開口表示想再合作,下次鬥戲鬥足一百場,更自認是美男嚇窒Daniel。

自稱美魔男的家輝(左)笑言想和吳彥祖合作溫情片。

家輝(左起)、吳彥祖、思漩和林超賢傾電影經傾到笑晒口。

思漩晒美背現身,非常誘人。

張家輝、吳彥祖、思漩、吳浩康、廖啟智及導演林超賢等昨晚到尖沙咀文化中心出席《第38屆國際電影節》閉幕電影、英皇新片《魔警》亞洲首映禮,眾星均盛裝出席,多數演員都穿上黑色衫,令身穿灰色西裝的家輝最突出,至於女主角思漩則以露背裝上陣,大騷兩吋事業線,配上價值300萬港元的英皇鑽飾,大晒閃爆貴氣!

台上Daniel表示早已希望跟家輝合作:「點知得兩場對手戲,其中一場家輝望住我,我已經好緊張!」其後家輝受訪時表示首次與Daniel合作,亦覺得唔夠喉,希望下次可以再鬥戲:「睇劇本嗰陣未知會係點,拍完都想再合作,下次鬥足100場啦!(覺得Daniel點?)佢係好演員,好認真對待角色!(下次想拍咩?)整套《美魔男之手足情未了》啦!(你得?)好難講!香港人對我有感情,其實我係想拍套輕鬆劇情片,好似當年湯告魯斯嗰套咁,好溫情!但最好加幾場床戲,但唔係同Daniel,係同啲靚女。」

思漩紅地氈驚叫

Daniel亦表示想跟家輝再拍警匪片,提到被家輝讚認真,他Cool爆地說:「咁又點?認真唔一定好,最緊要演得好睇。(咁今次好唔好睇?)永遠唔會滿意,藝術好難評,不過今次係幾滿意。」林超賢則表示跟Daniel闊別十年才合作,望可盡快再結片緣,對於家輝自認美男,Daniel即時嚇呆,林超賢則說:「佢對自己幾有信心!」此外,家輝與思漩行紅地氈時,感覺恍如占士邦與邦女郎,其後家輝行開讓思漩影單人照,經驗不夠的思漩突然驚叫,最後仍被家輝丟低,場面搞笑。