「宇宙最強」甄子丹昨日偕王寶強及莊思敏等出席電影《3D冰封俠：重生之門》發布會，他表示最難忘在「青馬大橋」拍攝，並慨嘆在港借景拍片遇阻滯。

甄子丹昨日宣傳電影時即席耍劍，不愧是「宇宙最強」！

甄子丹在台上打手印，希望新戲大賣。

甄子丹在老婆汪詩詩陪同下出席新戲發布會。

甄子丹昨日與太太汪詩詩、內地演員王寶強及莊思敏等到東莞觀瀾湖出席《3D冰封俠：重生之門》發布會，女主角黃聖依因病缺席。子丹透露今次落重本鋪天蓋地宣傳：「好多大片喺海底隧道落3、4塊廣告牌，但我哋依家有15塊廣告牌！」

着古裝講英文

他又指最難忘在舊香港啟德機場搭建的青馬大橋拍攝，同時感慨政府未有大力支持香港電影：「搭呢個景要有膽識同信念，唔係有錢就搭得成！香港借場拍戲好難，尤其係Hong Kong Style功夫動作喺外國有好大影響力，但政府唔珍惜電影文化，我覺得好可惜！」

提到簽約荷里活大型經理人公司CAA，並落實拍《臥虎藏龍２青冥寶劍》，子丹表示不會刻意接拍西片：「《臥虎2》都係西片，其實七年前已經搵我拍，但我一直猶豫不決，上年去康城都仲十五十六，古裝就拍得多，但拍古裝講英文就第一次！」